د شهیدانو او معلولینو چارو وزارت د حمایوي صندوق راټولې شوې پیسې د بغلان ولایت ورستېو سیلاب ځپلو هېوادوالو ته ورکړل شوې
د شهیدانو او معلولینو چارو وزارت رهبري او کارکوونکو د مستحقو یتیمانو، کونډو او معلولینو سره د مرستې په موخه یو ځانګړې حمایوي صندوق جوړ کړی دی چې هره میاشت له خپلو تنخواوو څخه یوه اندازه پیسې په خپله خوښه یاد حمایوي صندوق ته ورکوي.
د دې وزارت د رهبري د پریکړې سره سم د یاد صندوق راټولي شوې پیسې د بغلان ولایت د ورستېو سیلابونو له امله زیانمن شویو هېوادوالو ته د دې وزارت د یوه باصلاحیته پلاوي له خوا چې مشري یې د شهیدانو او معلولینو چار مرستیال محترم شېخ صاحب عبدالحکیم حقاني کوي بغلان ولایت کې ووېشل شوې.
د شهیدانو او معلولینو چارو وزارت د دعوت او ارشاد رئیس محترم مفتي عبدالاحد مسعود شهیدانو او معلولینو چارو په وزارت کې د یوې غونډې په ترڅ کې خبرې وکړې او وویل: الحمدلله نن په هېواد کې اسلامي نظام حاکم شوی او د دې هېواد وګړي د اخوت او ورورولۍ په فضا کې ژوند کوي. هغه همداراز وویل مسلمانان په خپلو کې سره وروڼه دي او باید په سختو شراېطو کې د یو بل لاسنېوی وکړي او هغوی سره لازمې مرستې ترسره کړي.
محترم مفتي عبدالاحد مسعود د وزارت له کارکوونکو څخه چې له دې صندوق سره یې مالي مرستې ترسره کړې خوښي څرګنده کړه او په دنیا او آخرت کې یې د دوی لپاره د سعادت او نیکمرغۍ دعا وکړه.
