د شهیدانو او معلولینو چارو وزارت کي (۲۵۰) تنو یتیمانو، کونډو او معلولینو خوراکي توکي ترلاسه کړل
د ترکیې هېواد د ټیکا مؤسسې له لورې او د یاد وزارت په همغږۍ پر(۲۵۰) تنو یتیمانو، کونډو او معلولینو باندې خوراکي توکي چې په هغه کې اوړه، وریجې، غوړي، لوبیا، نخود، بوره، چای او روب شامل وو، وویشل شول.
د مرستو د ویش پرمهال د ټولنیزو خدمتونو د تنظیم رئیس محترم مولوي ثناء الله فرقاني، د بهرنېو اړیکو او پلان رئیس محترم ملا صدوخان حق شناس او د ټیکا مؤسسې مشر محترم فاضل آکن اردوغان حضور درلود.
د یادو مرستو پر مهال محترم ملا صدو خان حق شناس خبرې وکړې او زیاته یې کړه: په هېواد کې د څلویښت کلونو جګړو په پایله کې ډیر خلک زیانمن شوي چې تر ټولو زیانمن قشر یتیمان، کونډې او معلولین دي او د دې وزارت اصلي موخه هم د یاد قشر لاسنېوی او هغوی ته د خدمتونو وړاندې کول دي.
په ورته وخت کې د یادې مؤسسې مشر د خبرو په ترڅ کې د خپلو فعالیتونو په اړه معلومات وړاندې کړل او زیاته یې کړه: د دې مؤسسې موخه اړمنو خلکو ته د مرستو رسول دي او هوډ لرو چې خپلو مرستو ته به دوام ورکړو.
