د شهیدانو او معلولینو چارو وزارت د داخلي تفتیش ریاست پلاوي خوست ولایت ته سفر وکړ
د شهیدانو او معلولینو چارو وزارت د داخلي تفتیش آمر محترم مولوي امان الله جمالي په مشرۍ یو پلاوي د خوست ولایت د شهیدانو او معلولینو چارو په ریاست کې د ترسره شويو کړنو او فعالیتونو څخه بررسي پېل کړه، خوست ولایت ته د پلاوي اصلي موخه د ترسره شويو کړنو د کیفیت او شفافیت معلومول دي تر څو د شهیدانو ورثه ؤ او معلولینو ته د خدمتونو وړاندې کولو په برخه کې شته نیمګړتیاوې په نښه او هغوي ته په بشپړه توګه رسیدګي وشي.
د بررسي پر مهال محترم مولوي امان الله جمالي د یاد ریاست کارکوونکو سره په کتنه کې له هغوی وغوښتل ترڅو ورسپارل شوې چارې په پوره اخلاص او امانتدارۍ ترسره کړي او هر وخت د جماعت د لمانځه پوره اهتمام وساتي.
په ورته وخت کې د خوست ولایت د شهیدانو او معلولینو چارو رئیس محترم مولوي عبدالرحیم احسان هم په چارو کې د شفافیت تأمین په برخه کې د تفتیش په ارزښت او اهمیت باندې مفصلې خبرې وکړې.
