محترم شیخ صاحب عبدالحکیم حقاني په ننګرهار ولايت کې د شهیدانو کورنۍ سره نغدي مرسته ترسره کړه
د شهیدانو او معلولینو چارو وزارت مرستیال محترم شیخ صاحب عبدالـحکیم حقاني ننګرهار ولایت ته یې د سفر پر مهال د هغې دردېدلې کورنۍ پوښتنې او فاتحې ته ورغی چې شاوخوا پنځه ورځې وړاندې د کابل ـ ننګرهار پر لویه لار باندې د یوې دردونکې ترافیکي پېښې له امله د کورنۍ شپږ (۶) تنه غړي شهیدان او درې تنه نور یې ټپيان شوي وو.
محترم شیخ صاحب د یادې کورنۍ له غړو سره خپله ژوره خواخوږي او همدردي څرګنده کړه، د پېښې د شهیدانو پاکو ارواحو ته یې د جنت الفردوس، ټپیانو ته یې د عاجلې روغتيا دعا وکړه او د لوی رب جل جلاله له دربار څخه یې د دې دردېدلې کورنۍ لپاره د صبر او زغم غوښتنه وکړه.
همداراز د محترم شیخ صاحب لخوا د یادې کورنې سره یو اندازه نغدي مرسته هم ترسره شوه.
