د شهيدانو او معلولينو په چارو کې د دولت وزير لعل الدين آريوبي پکتيا کې د اسنادو او وثیقو د څېړنې کمېټې له غړو سره وکتل
د شهيدانو او معلولينو په چارو کې د دولت وزير لعل الدين آريوبي پکتيا کې د اسنادو او وثیقو د څېړنې کمېټې له غړو سره وکتل
نن دوشنبه (۳۱وږې) د ولايتي سفر په ترڅ کې د شهيدانو او معلولينو په چارو کې د دولت وزير ښاغلي لعل الدين آريوبي، د پکتيا والي محترم حليم فدايي په ګډون، د ولايت د شهيدانو او معلولينو چارو د اسنادو او وثیقو د څېړنو کمېټې غړو سره ليدنه وکړه.
په دې ليدنه کې د پکتيا د محکمې، لويې څارنوالۍ، عامې روغتيا، د احصايې او معلوماتو ادارې او ملي امنيت رئيسانو ، باصلاحیته استازو او د شهيدانو او معلولينو چارو آمر ګډون درلود.
محترم آريوبي صيب، د شهيدانو او معلولينو چارو د اسنادو د څيړنې کمېسيون غړو سره د ياد کمېسيون پر کار او د اسنادو د څيړنو پروسې د لا شفافيت په موخه د برېښنايي پېژندپاڼو د وېش پر چټکتيا خبرې وکړې.
د ښاغلي آريوبي په خبره، چې دوی ته د شهيدانو وارثینو او معلوليت لرونکو وګړو د ستونزو حل لومړيتوب لري او هغوی ته د ژوند له لومړنيو اړتياوو را نيولې تر روغتيايي او تحصيلي زمينو برابرولو پورې اسانتياوې بايد برابرې شي.
نوموړي د پکتيا اړوندو ادارو ته سپارښتنه وکړه، چې د شهيدانو وارثينو، کورنيو غړو او معلوليت لرونکو وګړو ستونزو ته دې پر وخت رسېدنه وکړي.
د ناستې په پای کې د شهيدانو او معلولينو چارو د اسنادو څېړنې کميسيون غړو له محترم وزير لعل الدين آريوبي او مل پلاوي څخه مننه وکړه، چې د ياد ولايت د شهيدانو وارثينو او معلوليت لرونکو وګړو غوښتنې، ستونزې، وړاندېزونه يې له نږدې واورېدل او په همدې موخه يې پکتيا ته سفر را وکړ. د کمیسیون غړو وویل: پکتیا کې ۳۲۰۰ اسنادونه څیړل شوي، ۵۸۹ اسنادونه یې په ناقانونه توګه ثبت شوي وو رد شول.
ښاغلي آريوبي د شهيدانو او معلوليت لرونکو وګړو د اسنادو پروسې پر شفافيت او روڼتيا د ټينګار تر څنګ، د وزارت له اړخه له ټولو مسولو ولايتي چارواکو سره د هر ډول همکاريو ژمنه وکړه او له وزارت سره د ولايتي اړوندو ادارو د همغږۍ د زياتوالي لارښوونه وکړه.
