د شهیدانو او معلولینو چارو وزارت مسلکي او تخنیکي چارو مرستیال محترم الحاج ملا عبدالرزاق آخند د جرمني هېواد د جي آی زیډ مؤسسې له پخواني مشر سره په خپل کاري دفتر کې وکتل
د شهیدانو او معلولینو چارو وزارت مسلکي او تخنیکي چارو مرستیال محترم الحاج ملا عبدالرزاق آخند د جرمني هېواد د جي آی زیډ مؤسسې له پخواني مشر محترم هنس دوبه سره وکتل. په دې کتنه کې د دې وزارت د بهرنېواړیکو او پلان رئیس محترم ملا صدوخان حق شناس او د افغان جرمن ټولنې مشر محترم احمد الیاس عمر هم حضور درلود.
په دې کتنه کې د شهیدانو او معلولینو چارو مرستیال وویل: الحمدلله د اسلامي امارت له فتحې سره سم په هېواد کې سراسري امنیت رامنځ ته شوی او ټول وګړي په سوله ییزې فضا کې د ورورګلوۍ ژوند تیروي. هغه همداراز زیاته کړه: موږ ته د څو لسیزو جګړو په پایله کې ډیر شمېر یتیمان، کونډې او معلولین را پاتې دي چې د هغو له ډلې داسې وګړي هم زمونږ سره ثبت دي چې د کورنۍ اکثریت غړي یې له لاسه ورکړي او یاهم معلول شوي دي، په دې کتنه کې هغه وویل دا به غوره وي که خیریه بنسټونه او مؤسسې له دې اړمن قشر سره لا ډیرې مرستې ترسره کړي.
محترم الحاج ملا عبدالرزاق آخند همداراز وویل: هغوی چې دې هېواد ته د خدمت کولو په موخه راځي د هغوی به هرکلی کیږي او افغانان به هیڅکله هم چاته اجازه ورنکړي چې دې هېواد ته د اشغال او غصب په موخه راشي.
په ورته وخت کې د جرمني هېواد د جي آی زیډ مؤسسې پخواني مشر محترم هنس دوبه خبرې وکړې او ویې ویل: ډیر د خوښۍ ځای دی چې نن ورځ افغانان په یوه سوله ییزه فضا کې آزاد او آرام ژوند تیروي.
هغه همداراز زیاته کړه، "هغه مثبت بدلون او کړنې چې ما، د څو ورځو په موده کې په دې هېواد کې لیدلې هغه به د جرمني هېواد له سیاسیونو او حکومتي مسؤلینو سره شریکي کړم تر څو هغه منفي ذهنیتونه چې د اسلامي امارت په تړاو هلته رامنځ ته شوي هغه ته به د عیني حقایقو په وړاندې کولو سره بدلون ومومي او د دوو هېوادونو تر منځ به د تعامل او اعتماد فضا رامنځ ته شي."
