د شهيدانو او معلولینو چارو وزير محترم الحاج ملا عبدالمجید آخند فاریاب ولایت ته سفر وکړ
![mmd](/sites/default/files/2024-08/whatsapp_image_2024-08-27_at_7.20.01_pm.jpeg)
د شهيدانو او معلولینو چارو وزير محترم الحاج ملا عبدالمجید آخند چې په دې سفر کې يې د دې وزارت د مالي او حسابي چارو رئيس محترم مولوي محمد امین دروېش، د خاصو شهیدانو آمر محترم مولوي محمد، د ډېټابېس او معلوماتو رياست د پروژې مالي مسؤل محترم مولوي شبیر احمد خادم یې ملتیا کوله، د فارياب ولايت د شهيدانو او معلولینو چارو رياست د کاري بهیر د ارزونې تر څنګ، د دې ولايت په قیصار، شیرین تګاب، پشتون کوټ او ګرزيوان ولسوالېو کې د فدايانو کورنېو، د متعددو شهیدانو کورنېو او د هغو معلولینو سره چې د تېر شل کلن جهاد پر مهال یې د خپل بدن دوه غړي له لاسه ورکړي وو، له نږدې وکتل، د هغوی ستونزې او غوښتنې یې واوریدې، هغوی ته یې د خواخوږۍ او همدردۍ مراتب وړاندې کړل او ورسره یې یوه اندازه نغدي مرستې هم ترسره کړې.
محترم وزیر صاحب د شهیدانو له کورنېو سره په کتنه کې وویل: په هېواد کې اسلامي نظام د مجاهدینو د سرښندنو او قربانېو په برکت منځ ته راغلی او د اسلامي امارت مسؤلین ژمن دي چې د شهیدانو کورنېو او معلولینو ته ګټور او شفاف خدمتونه وړاندې کړي.
همداراز د دې وزارت د مالي او حسابي چارو رئیس محترم مولوي محمد امین درویش د یتیمانو، کونډو او معلولینو د ثبت شویو آمارو او ارقامو په اړه هر اړخیز معلومات وړاندې کړل او وې ویل: دې وزارت د مرکز په ګډون په ټولو ولایتونو کې ( ۶۵۳) زره او (۲۶۵) تنه یتیمان، کونډې او معلولین ثبت او راجسټر کړې دي او د فارياب ولايت د شهيدانو او معلولینو چارو ریاست ته (۳۰۰) میلیونه افغانۍ بودیجه ځانګړې شوې وه چې له هغې جملې څخه (۲۴۰) میلیونه افغانۍ د روان مالي کال په لومړیو شپږو مياشتو کې د یتیمانو، کونډو او معلولینو د میاشتنۍ نغدي مساعدتونو په توګه مصرف شوي دي.
نوموړي همداراز یتیمانو، کونډو او معلولینو ته د میاشتنۍ نغدي مرستو د ورکړې په بهیر کې د بشپړ شفافیت ډاډ ورکړ او ویې ویل: د شهیدانو او معلولینو چارو وزارت له هر ډول تبعیض پرته د منظور شوې طرحې سره سم مستحقینو ته نغدي مرستې په مساوي ډول حواله کوي.
د یادولو وړ ده چې محترم وزیر صاحب له دې وړاندې بلخ، جوزجان او سرپل ولایتونو ته هم سفر کړی وو چې د دې سفرونو په ترڅ کې یې د شهيدانو او معلولینو چارو ریاستونو کاري بهیر څخه ارزونه ترسره کړه، او د شهيدانو ورثه ؤ او معلولینو ته یې د ښو خدمتونو وړاندې کولو په موخه اړوندو مسؤلینو ته لازم هدايات ورکړل.