د شهیدانو د ورثې او معلولیت لرونکو وګړو په اړه د جمهور رییس لارښوونې په جدي توګه ترسره کېږي
د شهیدانو د ورثې او معلولیت لرونکو وګړو په اړه د جمهور رییس لارښوونې په جدي توګه ترسره کېږي
د شهیدانو او معلولینو په چارو کې د دولت وزیر ښاغلي لعل الدین آریوبي د وزارت د نظامي چارو د مرستیالې او د څار او ارزونې رییس په ملتیا د شهیدانو د ورثې د وثیقو او معلولینو د اسنادو د څېړنې او د حقوقو او امتیازاتو ورکړې په برخه کې د اصلاحاتو د پلي کولو په اړه د جمهور رییس د لارښوونو د تعقیب لپاره د جمهوري ریاست د چارو ادارې مسولینو سره غونډه وکړه.
ښاغلي آریوبي د یاد قشر په اړه د جمهور رییس د لارښوونو د تعقیب او د وزارت د اقداماتو په اړه معلومات وړاندې کړه وویل: د شهیدانو او معلولینو د حقوقو او امتیازاتو قانون د تعدیل طرحه ترتیب شوې، د شهیدانو د ورثې او معلولینو د ثبت لپاره واحد برېښنایي سیستم رامنځته شوی دی، د شهیدانو د ورثې او معلولینو د حقوقو ورکړې لارښود جوړ او پلي شوی او همدارنګه د شته بانکي حسابونو څېړنه او د نویو کارتونو د وېش بهیر په جریان کې دی. ښاغلي آریوبي زیاته کړه، چې د ولایتي او مرکزي واحدونو څېړنه او ارزونه هم ترسره شوې ده.
ښاغلي آریوبي وړاندیز وکړ، چې د مرکز او ولایتونو په کچه دې د اسنادو او وثیقو د څېړنې، د شهیدانو او معلولینو د حقوقو او امتیازاتو قانون د تعدیل طرحې د طی مراحلو او د برېښنایي تذکرو د وېش بهیر او بایومتریک پروسې په برخو کې دې اړوندې ادارې جدي همکاري وکړي.
د چارو ادارې مسولینو د وزارت کړنې وستایلې او ژمنه طې وکړه، چې په ټولو وړاندیز شویو برخو کې به د دولت وزارت سره هر اړخیزه همکاري او همغږي وکړي
