د شهيدانو او معلولينو چارو وزارت د ولايتي آمرينو د همغږۍ او ظرفيت لوړونې روزنيز ورکشاپ پای ته ورسيد
د شهيدانو او معلولينو چارو وزارت د ولايتي آمرينو د همغږۍ او ظرفيت لوړونې روزنيز ورکشاپ پای ته ورسيد
د شهیدانو او معلولینو چارو وزارت د ولایتي آمرينو د همغږۍ او ظرفیت لوړونې ورکشاپ دریمه ورځ د شهیدانو او معلولینو وزارت د ملاتړ او خدمتونو مرستيالې جمیلې نورستانۍ په وينا پیل شو.
د ورکشاپ په درېيمه ورځ، ولایتي آمرينو د خپلو ادارو اړوند ستونزې او غوښتنې د وزارت مشرتابه ته وړاندې کړې.
د شهیدانو ورثې او معلولینو د اسنادو د سمونې او کتنې پروسې چټکتيا، اداري تشکيلاتو، بودیجې، د بریښنايي پېژندپاڼو وېش، د ۱۴۰۰ کال معاشونو بشپړه ورکړه او د تېرو کلونو پاتې حقونو د ورکړې څرنګوالی، د ولایتي دفترونو او چارو لپاره د تعميرونو نشتوالي، د معلوليت ملي ستراتيژۍ د پلې کولو او نورو اړوند مسايلو په اړه خبرې وشوې او د وزارت له مشرتابه څخه يې د هواري غوښتنه وکړه.
د وزارت د پلان او پالیسۍ رییس، د معلولینو لپاره د څیړنیز انستیتوت رییس، د نوي بریښنايي سیسټم چارواکو او د وزارت حقوقي سلاکار د وزارت د راتلونکو پلانونو، موخو او د حقونو د ورکړې میتودونو، د چارو د ښه والي او همغږۍ زياتولو په پار د روزنيز ورکشاپ ګډونوالو ته خپل پریزنټیشنونه وړاندې کړل.
د ورکشاپ د درېیمې ورځې بله برخه د اسنادو او وثيقو د بیاکتنې او سمونې کمیټو باندې بحث وشو، چې د يادې کميټې غړو هم پکې ګډون درلود. د اسنادو بیاکتنې او سمونې پروسې بحث او د دې بهير د ګړندي کولو څرنګوالي په اړه هر اړخيز بحث وکړ.
د ورکشاپ په وروستۍ ورځ ولايتي آمرينو پوښتنو ته د وزارت رهبري هيئت لخوا د قناعت وړ ځوابونه وويل شول او په ولايتي آمريتونو کې د چارو په تراسراوي کې له هغوی څخه د روڼتیا او جدي څار غوښتنه وشوه.
د یادونې وړ ده، چې ياد درې ورځنی روزنيز ورکشاپ د شهيدانو او معلولينو چارو وزارت په مشرۍ او د COMAC بهرنۍ مؤسسې په مالي ملاتړ د ولايتي آمرينو او وزارت کارکوونکو د همغږۍ زياتولو او ظرفيت لوړونې په موخه جوړ شوی و، کوم چې نن سه شنبه پای ته ورسيد.
