په یو سل او اویا معلولیت لرونکو وګړو باندې نغدي مرستې وویشل شوې
په (۱۷۰) بې وزله معلولیت لرونکو وګړو باندې د (UMMAH) خیریه بنسټ لخوا نغدي مرستې ترسره شوې. ياد شوي کسان څه موده وړاندې د شهيدانو او معلولينو چارو وزارت د ټولنيزو خدمتونو د رياست له خوا د يوې سروې په ترڅ کې مستحق ګڼل شوي وو.
د یادو مرستو د ویش په بهیر کې د شهيدانو او معلولينو چارو وزارت مرستيال شيخ صاحب عبدالحکيم حقاني، د نوموړي وزارت د دفتر رئیس قاري شاه محمد دوست، د معلولینو چارو رئیس مولوي عبدالنافع منتفع او همداراز د ټولنیزو خدمتونو رئیس مولوي ثناالله فرقاني هم ګډون درلود.
په دې مرستو کې د هر معلول لپاره (۹۰۰۰) افغانۍ په پام کې نیول شوې وې، چې د (UMMAH) خیریه بنسټ د رئیس مفتي المرجان عاکف مدني له خوا د شهیدانو او معلولینو چارو وزارت په همغږۍ پر اړمنو کسانو وویشل شوې.
د شهیدانو او معلولینو چارو وزارت د دفتر رئیس قاري شاه محمد دوست معلولیت لرونکو وګړو ته د (UMMAH) خیریه بنسټ له نغدي مرستو مننه وکړه او له نورو کورنېو او بهرنېو خیریه بنسټونو څخه یې وغوښتل تر څو له معلولینو او یتیمانو سره مرستې وکړي. نوموړي زیاته کړه چې دا لړۍ به په راتلونکي کې په یو شمیر نورو ولایتونو کې هم دوام ومومي.
