ژمن يو چې د دفاعي او امنيتي شهيدانو ورثې او معلولينو لپاره اغيزناک خدمات وړاندې کړو
ژمن يو چې د دفاعي او امنيتي شهيدانو ورثې او معلولينو لپاره اغيزناک خدمات وړاندې کړو
نن سه شنبه د کب په پنځمه، د شهيدانو او معلولينو چارو وزير پوهنمل حميدالله فاروقي د دفاعي او امنيتي شهيدانو بنسټ له غړو سره وکتل او د دفاعي او امنيتي شهيدانو وارثينو ستونزې، غوښتنې او وړانديزونه يې واوريدل.
د ناستې په پيل کې د دفاعي او امنيتي شهيدانو بنسټ رئيس، ښاغلي نجيب الله ضميري او نورو غړو خبرې وکړې او د شهيدانو ورثې د حقونو کموالي، سرپناه نشتون، په مرکز او ولايتونو کې د اسنادو او وثيقو د پروسس بهير د سستوالي، اداري فساد، ستونزو ته پر وخت نه رسيدنې او د شهيدانو مېرمنو لپاره د اسنادو د طی مراحل په جريان کې د مناسب چاپيريال نشتوالي ستونزې شريکې کړې او د حل غوښتنه يې وکړه.
د شهيدانو او معلولينو چارو وزير پوهنمل حميدالله فاروقي د دفاعي او امنيتي شهيدانو قربانيو ته د درناوي او ستاينې ترڅنګ، د دوی وارثينو ستونزو ته رسيدنه يې کاري لومړيتوب وګاڼه او په دې برخه کې يې د هر ډول اړينو اقداماتو ترسره کېدو او همکاريو ډاډ ورکړ.
ښاغلي فارقي زياته کړه، چې د هېواد جګړييز وضعيت، فقر، بېکارۍ او منابعو نشتون سره سره د دفاعي او امنیتي شهيدانو کورنيو لپاره، د هر ډول اسانتياوو برابرول مهم دي او دوی ژمن دي چې د دفاعي او امنيتي شهيدانو ورثې لپاره اغيزناک خدمات وړاندې کړي.
نوموړي له فساد سره مبارزه خپله ديني او ملي وجيبه وګڼله او په دې برخه کې د شهيدانو ورثې او معلولينو مدني بنسټونو څخه د همکارۍ او همغږۍ غوښتونکی شو.
د ښاغلي فاروقي په خبره، چې له شته امکاناتو په اعظمي ګټه اخيستنې سره به، نه يوازې د نظامي شهيدانو ورثې او معلولينو؛ بلکه د ټولنې ټول جګړې ځپلي ولس لپاره د ژوند په هره برخه کې د اسانتياوو رامنځته کولو، د هغوی د اړتياوو پوره کولو او ستونزو ته د رسيدنې په موخه به خپلو هڅو او کار ته دوام ورکوي.
