د وزیر ژوندلیک

د شهیدانو او معلولینو چارو د سرپرست او نوماند وزیر ښاغلي پوهنمل حمید الله فاروقي ژوندلیک

minster's photo

۱۴۰۰ / ۱ / ۱
ښاغلی حميد الله فاروقي د ارواښاد حبيب الله فاروقي زوى دی. په ۱۳۳۳ لمريز ) ۱۹۵۴ ميلادي( كال په هرات ولايت كې په يوه درنه او دينداره كورنۍ كې زېږېدلی دی. ښاغلي فاروقي خپلې لومړنۍ زده كړې د سيد جمال الدين افغان په ښوونځي او منځنۍ زده كړې يې د كابل ښار حبيبيې عالي ليسه كې بشپړې كړې دي. په ۱۳۵۲ لمريز كال کابل پوهنتون كې شامل او په ۱۳۵۵ لمريز كال كې د ياد پوهنتون له اقتصاد پوهنځي څخه فارغ شو. د لوړو زده كړو ترلاسه کولو وروسته د تعليمي مركز غونډ د احتياطي ضابطانو په كورس كې شامل شو او شپږ مياشتې يې تر ملي بيرغ لاندې خدمت و كړ . ښاغلي فاروقي په ۱۳۵۶ لمريز كال د پلان وزارت په بېلابېلو برخو كې خدمت وكړ، خو پر افغانستان د سرو لښكرو تر يرغل وروسته يې له دولتي دندې استعفا وکړه او خپلې شخصي سوداګري ته يې مخه كړه .
د سرو لښكرو پر خلاف د مبارزينو له دريځه تر ملاتړ وروسته فاروقي لکه د نورو افغانانو په څېر پاكستان ته کډوال شو، چې هلته تر يوې مودې پاتې کېدو وروسته د امريكا متحدو ايالتونو ته ولاړ او خپلو لوړو زدكړو ته يې دوام وركړ.
په ۱۹۹۵ كال كې يې د امريكا د متحده ايالتونو د نيويارك دولتي پوهنتون څخه د اقتصاد برخه كې د ماسټرۍ ديپلوم تر لاسه كړ . نوموړي د ګډوالۍ پر مهال هم د افغانانو د يووالي لپاره ټولنې رامنځته کړې او پر اقتصادي او سياسي مسايلو
يې ګڼې مقالې وليکلې. ښاغلی فاروقي په ۲۰۰۱ ز كال كې د بن كنفرانس او په افغانستان كې د لنډ مهالې ادارې له جوړېدو وروسته هېواد ته راستون شو. دلته د كابل پوهنتون د اقتصاد پوهنځي په علمي كدر كې شامل او له ۱۳۸۲ كال راهيسې د هېواد بچيانو ته د زده كړو له لارې خدمت كوي. ښاغلي فاروقي په وروستيو كلونو كې د ښوونې او روزنې، سوداګريزو ټولنو او خصوصي سكتور برخو کې د ټولنو په جوړولو، د خصوصي ښوونځيو او خصوصي پوهنتونونو په جوړولو، د فكري او علمي بنسټونو او ټولنو په جوړښتونو او د ولسي شوراګانو په جوړولو كې فعاليتونه كړي دي .
ښاغلي فاروقي د هېواد او سيمې پر اقتصادي او سياسي مسايلو ګڼې علمي او تخصصي مقالې ليكلي او په كور دننه او بهر يې په نړيوالو كنفرانسونو، وركشاپونو، سمينارونو او سمپوزيمونو كې د فعاله ګډون تر څنګ خپلې مقالې هم وړاندې کړي دي . د سولې په ټولو جرګو او سترو ملي ناستو كې يې غړيتوب او مسوليت اخيستى او په وروستيو كلونو كې د استادۍ د سپېڅلي دندې تر څنګ د افغانستان د سوداګرۍ او صنايعو نړيوالې خونې (AICC) د عامل پلاوي رياست، د افغان ملي بانك د مديره پلاوي رياست، د خانهء نور خصوصي ښوونځي او پوهنتون د مديره پلاوي رياست، د لوګر خلكو د سراسري شورا رياست، د برېښنا فكري ټولنې رياست، د افغانستان د اقتصاد دانانو انجمن رياست او په هېواد كې د ځينو نورو علمي او اقتصادي موسساتو افتخاري مديره پلاوي غړيتوب تر لاسه كړى دى . نوموړي د وروستيو کلنو په اوږدو کې په يو شمېر سيمه ييزو او نړيوالو ناستو کې د افغانستان ريښتينی او با مسوولته استازيتوب کړی دی. ښاغلی حميد الله فاروقي د ۱۳۸۷ لمريز كال كب مياشت كې د افغانستان د ملي شورا له ولسي جرګې څخه د تاييد رايې ترلاسه کولو وروسته د افغانستان د اسلامي جمهوريت د ترانسپور ټ او ملكي هوايي چلند د وزير په توګه د حکومت کابينه کې شامل شو. ښاغلي پوهنمل حميدالله فاروقي په خپل وروستي مسووليت کې، چې د ملي دفاع وزارت د لوجستکي تړونونو د څېړونکي پلاوي په راس کې و، په پوره ايماندارۍ، ريښتينولۍ او زړورتيا وکړای شوه د مفسدينو جېب ته تلوون کي هغه سلګونه ميليونه ډالر را وګرځوي، چې د هېواد د سرتېرو لپاره ځانګړې شوي وو. نوموړي همدا راز د افغانستان د جمهور رييس جلالتمآب محمد اشرف غني له باور څخه په ګټې اخيستنې د دولت د يو لړ اصلاحي برنامو مشري هم کړې ده، چې له دې ډلې څخه د هرات ولايت د هر اړخيزو اصلاحاتو په موخه د لوړپوړي پلاوي مشري، د کابل بانک د قضيې د څېړنې، په سکتوري وزارتونو کې د سمون راوستلو، او نورو ملي او دولتي برنامو مشري يادولای شو. ښاغلی حميد الله فاروقي د جلالتمآب جمهور رييس د فرمان پر بنسټ د جمهور رييس سلاکار وزير او د کابينې د غړي او هممهاله د ۱۳۹۵ کال د زمري مياشتې په ۱۴ نېټه د جمهوري رياست عالي مقام د ۱۴۷۰ ګڼې فرمان پر بنسټ د کابل پوهنتون د رييس په توګه وګمارل شو. نوموړی د افغاني سرې مياشتې ټولنې د رهبرۍ بورډ غړيتوب او همدارنګه د سويلي اسيا پوهنتون ) SAU ( اجرائيوي بورډ غړيتوب، چې د سيمه ييزو هيوادونو همکاريو سازمان ) SAARC ( پورې تړلی دی، ترسره کړی او ښاغلي فاروقي پکې له کابل پوهنتون او د افغانستان اسلامي جمهوريت څخه استازولي کړې ده. پر دې سربېره په ۱۳۸۹ کال کې د لوګر ولايت د خلکو سراسري شورا له جوړولو راهيسې په پرلپسې ډول د يادې شورا منتخب رييس او د دې باعزته ټولنيزې شورا د رهبرۍ وياړ لري. ښاغلی فاروقي په دې وروستيو کې د هېواد د جلالتمآب جمهور رييس محمد اشرف غني د ۱۵۰ ګڼې حکم له مخې د ۲۸ / ۱۰ / ۱۳۹۹ نېټه د شهيدانو او معلولينو په چارو کې د دولت وزير او ورپسې د ۳۰۴۲ ګڼې حکم د لارښوونې پر بنسټ د ۷ / ۱۱ / ۱۳۹۹ نېټه د شهيدانو او معلولينو چارو د سرپرست او نوماند وزير په توګه وټاکل شو. ښاغلي حميدالله فاروقي واده كړى؛ څلور لوستي او ژمن اولادونه يې ټولنې ته وړاندې کړي دي. نوموړی په پښتو، دري او انګليسي ژبو خبرې او
ليكل کولای شي.

د پی ډی اف فایل ډاونلوډ کړئ