د شهیدانو او معلولینو چارو وزارت مل پلاوي په جوزجان ولایت کې د دغه وزارت له اړوند ریاست د کړنو څخه هر اړخیزه ارزونه وکړه
په دې ارزونه کې د شهیدانو او معلولینو چارو وزارت مل پلاوي د یاد ریاست د کړنو او فعالیتونو څخه عمومي ارزونه وکړه او د نوموړي پلاوي لخوا یتیمانو او معلولیت لرونکو وګړو ته د غوره او معیاري خدمتونو د وړاندې کولو په موخه د یاد ریاست کارکوونکو ته لازمې لارښوونې ورکړل شوې او همداراز د بودیجې د لګولو د بهیر پرګړندیتوب هم ټینګار وشوه.
د شهیدانو او معلولینو چارو وزارت د مالي او اداري چارو عمومي رئیس کلیم الله افغان له دغه ریاست څخه د ارزونې پر مهال وویل: ډیر د خوښي او نیکمرغۍ ځای دې چې نن ورځ د هېواد د داخلي عوایدو څخه د اسلامي امارت بودیجه تمویلیږي او د بودیجې تمویل کوم هیواد یا نړیوال سازمان پورې تړلي نه دی، نوموړي ټینګار وکړ، چې د شهیدانو د وارثینو او معلولینو ته د حقوقو د ورکړۍ په پروسه هیڅ ځڼد او خند ورته د منلو نه دی او باید هڅه وشي تر څو ځانګړې شوی بودیجه پر وخت او شفاف ډول مصرف شي.
نوموړي زیاته کړه، چې یتیمان او معلولیت لرونکي وګړي د ټولنې تر ټولو اړمن قشر دی، نو باید د دوی د حقوقو او امتیازاتو د ورکړې په پروسه کې هیڅ ډول ځنډ رامنځته نشي.
د جوزجان ولایت د شهیدانو او معلولینو چارو رئیس مولوي شبیر احمد مقصود د نوموړي پلاوي له څارنې او ارزونې څخه خوښي څرګنده کړه او ویې ویل: د شهیدانو او معلولینو چارو وزارت له لوري د طرحې او کړنلارې په تصویب سره ستونزې او ننګونې له منځه تللي او په دې ریاست کې د یتیمانو او معلولینو د حقوقو د ورکړۍ بهیر چټک شوی دی.
د شهیدانو او معلولینو چارو وزارت مل پلاوي د یتیمانو او معلولینو د تثبیت په پروسه کې د جعل او تذویرد مخنیوي په موخه له یو شمېر یتیمانو او معلولیت لرونکو وګړو سره وکتل.
د یادونې وړ ده چې د ارزونې د پلاوي په ترکیب کې د داخلي تفتیش رئیس مولوي احسان الله حقاني، د معلولینو چارو رئیس مولوي عبدالنافع منتفع او د څارنې او ارزونې ریاست غړی شامل دي، چې مشري یې د شهیدانو او معلولینو چارو وزارت د مالي او اداري چارو عمومي رئیس مولوي کلیم الله افغان کوي او په پام کې ده چې یاد پلاوی به د سرپل، بادغیس، فاریاب او کندز ولایتونو د شهیدانو او معلولینو چارو ریاستونو له کړنو او فعالیتونو څخه هم ارزونه وکړي.
