د شهیدانو او معلولینو چارو وزارت مرستیال محترم شیخ صاحب عبدالحکیم حقاني د ترکیې هېواد د نداء الخیر مؤسسې له مشر او راغلي پلاوي سره وکتل
د شهیدانو او معلولینو چارو وزارت مرستیال محترم شېخ صاحب عبدالحکیم حقاني د ترکیې هېواد د نداء الخیر مؤسسې له مشر محترم حمزه کوکسال سره په خپل کاري دفتر کې وکتل، د دې کتنې پر مهال د دې وزارت د مقام دفتر رئیس محترم مولوي شاه محمد دوست، د ټولنیزو خدمتونو د تنظیم رئیس محترم مولوي ثناء الله فرقاني، د ترکیې هېواد د انقرې ښار د سرې میاشتې ټولنې رئیس محترم محمد سیلای او د یاد هېواد یو شمېر تجارانو حضور درلود.
په دې کتنې کې محترم شیخ صاحب عبدالحکیم حقاني په اوسني عصر کې د مسلمانانو د یووالي او پيوستون په اړتیا خبرې وکړې او ویې ویل: د فلسطین مظلوم ولس نن د یهودیانو د ظلم په اور کې سوځي او د افغانستان خلک د نورو هېوادونو په پرتله دا موضوع ښه درک کولای شي ځکه چې د دې خاورې خلک د تیرو څو لسیزو په جګړو کې له ورته ظلمونو او ستونزو سره مخ وو، او اسلامي نړۍ نن ورځ د پخوا په پرتله پیوستون او یووالي ته ډیره اړتیا لري.
محترم شیخ صاحب همداراز زیاته کړه: د افغانستان د خلکو د جهاد اصلي موخه په دې هېواد کې د اسلامي نظام ټینګښت وو، الحمد لله د اسلامي امارت مجاهدین دغې موخې ته ورسید او ستاسو څخه مو هیله دا ده چې د اسلامي امارت ښه انځور د تركيې ولس ته وړاندې كړې تر څو کوم منفي ذهنیتونه چې د ځینو ډلو لخوا رامنځته شوي هغه بدلون ومومي.
هغه همداراز مستحقینو ته د مرستو رسولو په برخه کې د بشپړ شفافیت ډاډ ورکړ او وې ویل: د شهیدانو او معلولینو چارو وزارت د اسلامي امارت د شهیدانو ورثه ؤ او معلولینو او دغه راز د تېرې ادارې یتیمانو، کونډو او معلولینو ته یو ډول میاشتنې نغدي مرستې ورکوي.
د شهیدانو او معلولینو چارو وزارت مرستیال له یاد پلاوي څخه وغوښتل چې یتیمانو ته د فني او حرفوي زده کړو او معلولینو ته د مصنوعي غړو جوړونې، د برېښنایي ویلچرونو چمتو کولو او همداراز د ژوند په نورو برخو کې لازمې اسانتیاوې رامنځته کړي.
په ورته وخت کې د ترکیې هېواد د نداء الخیر مؤسسې مشر او ورسره راغلي پلاوي په افغانستان کې د اسلامي نظام رامنځته کیدل یې د ټولو اسلامي هیوادونو لپاره یوه ښه بیلګه وبلله او زیاته یې کړه: د ټولې نړۍ مسلمانان په دې هیواد کې د اسلامي نظام له رامنځته کیدو سره خوشحاله دي او د لوی خدای جل جلاله په مرسته به، په دې هیواد کې شته اقتصادي او ټولنیزې ستونزې هم حل شي.
همداراز یاد پلاوي یتیمانو، کونډو او معلولینو ته د مرستو برابرولو په برخه کې د هر اړخیزې همکارۍ ژمنه وکړه.
