د شهیدانو او معلولینو چارو وزارت سرپرست د وزارت له بیلابیلو څانګو او کاري دفترونو څخه لیدنه وکړه
د شهیدانو او معلولینو چارو سرپرست او نوماند وزیر ښاغلي پوهنمل حمیدالله فاروقي د وزارت له بیلابیلو څانګو، کاري دفترونو او مراجعینو ته د خدمتونو د وړاندې کولو پروسې څخه له نږدې لیدنه وکړه او په دې اړه یې د کارکوونکو او مراجعینو ستونزې او غوښتنې هم واوریدې.
پدې لیدنه کې، ښاغلي فاروقي، پداسې حال کې چې د هیواد اتباعو ته د روڼتیا او چټک خدمتونو وړاندې کولو باندې ټینګار وکړ، د اړوندو څانګو مسوولینو ته یې لارښوونه وکړه چې ټول خدمتونه باید په وخت سره چمتو شي او زیاته یې کړه چې د مراجعینو د اسنادو په طی مراحلو کې باید له خنډ او ځنډ څخه مخنېوی وشي.
ښاغلي فاروقي کارکوونکو ته په خطاب کې وویل چې دا د ویاړ ځای دی په دې سختو شرایطو کې هېوادوالو ته خدمتونه وړاندې کوی او د هغوی ستونزی او غوښتنو ته رسیدګی کوی او په دې شرایطو کې ټول باید کوښښ وکړئ تر څو هېوادوالو ته غوره خدمتونه وړاندې کړئ.
په دې لیدنه کې ښاغلي فاروقي ژمنه وکړه چې په دې وزارت کې به د خدمتونو د وړاندې کولو لړۍ په چټکه او رڼه ډول وړاندې شي او لا ډیرې اسانتیاوې به رامنځ ته کړي. ښاغلي فاروقي همداراز زیاته کړه چې د مراجعینو ټولې ستونزې به حل شي.
