د شهیدانو او معلولینو چارو وزارت د مالي او اداري چارو عمومي رئیس د لوګر ولایت د شهیدانو او معلولینو چارو ریاست څخه لیدنه وکړه
د شهیدانو او معلولینو چارو وزارت د مالي او اداري چارو عمومي رئیس ښاغلي مولوي كلیم الله افغان د یو لړ ولایتي سفرونو په ترڅ كې د یو پلاوي سره د لوګر ولایت د شهیدانو او معلولینو چارو ریاست څخه لیدنه وکړه. په دې سفر کې د شهیدانو او معلولینو چارو وزارت د مالي او حسابي رئیس، د څارنې او ارزونې، د تفتیش او همدارنګه د بشري سرچینو ریاستونو استازیو د ښاغلي مولوي کلیم الله افغان ملتیا کوله، د لوګر ولایت دشهیدانو او معلولینوچارو ریاست د کارکوونکو د کړنو څرنګوالې یې وڅیړل، او یاد ریاست پر وړاندې یې شته ستونزې او ننګونې واورېدې.
د شهیدانو او معلولینو چارو وزارت پلاوي د یاد ولایت دشهیدانو او معلولینوچارو ریاست د کارکوونکو او ادارې عمومي ارزونه وکړه، او د ادارې د لا ښه والي په موخه یې لازمې لارښوونې ورکړې، او په همدې حال کې یې د 1401 کال د پنځو میاشتو د بودیجې لګښت د څرنګوالي په اړه هم لازمې خبرې اترې وکړې.
په پام کې ده چې ښاغلي مولوي کلیم الله افغان د دغو ولایتي سفرونو په لړ کې د پکتيا، خوست او پکتيکا ولایتونو دشهیدانو او معلولینو چارو ریاستونو څخه هم لیدنه وکړي چې د دې سفر اصلي موخه یې د اړوندو رياستونو له کړنو او د فعالیتونو د څرنګوالي ارزونه ده.
