د شهیدانو او معلولینو چارو وزارت یتیمانو او معلولینو لپاره د حرفوي زده کړو روزنیز پروګرام پیل کړ
د شهیدانو او معلولینو چارو وزارت د بیوزلو یتیمانواو معلولیت لرونکو وګړو لپاره د کمپیوټر او برښنایي وسایلو د ترمیم په برخه کې څلور میاشتنې روزنیز پروګرام پیل کړل.
د دې روزنیز پروګرام په پرانیست غونډه کې د شهیدانو او معلولینو چارو وزارت تخنیکي او مسلکي مرستیال ښاغلي مولوي عبدالرزاق آخند، د مالي او اداري چارو عمومي رئیس ښاغلي مولوي کلیم الله افغان، د دعوت او ارشاد رئیس مفتي عبدالاحد مسعود، د مالي او حسابي چارو رئیس قاري محمد امین درویش، د فلجیانو او لاوارثه یتیمانو د پالنې مرکز رئیس ملا صدو آخند، د داخلي تفتیش رئیس ښاغلي مولوي احسان الله حقاني او د یاد وزارت د اطلاعاتو او عامه اړیکو مسؤل مفتي فیصل خاموش او ځینو نورو مسؤلینو هم ګډون درلود.
په دې غونډه کې د شهیدانو او معلولینو چارو وزارت د مالي او اداري چارو عمومي رئیس ښاغلي مولوي کلیم الله افغان، دا ډول حرفوي پروګرامونه د معلولینو او یتیمانو لپاره مهم وبلل او له ګډونوالو څخه یې وغوښتل تر څو یاد روزنیز پروګرام په زده کړه کې له دقت او غور څخه کار واخلي.
نوموړي د یاد وزارت د لاسته راوړنو په اړه هم خبرې وکړې او زیاته یې کړه: د شهیدانو او معلولینو چارو وزارت تر دې دمه (۵۰۰۰۰۰) پنځه لکو څخه زیات معلولین، یتیمان او کونډې ثبت کړې دي چې د هغوي له جملې څخه نږدې (۳۵۰۰۰۰) درې لکه او پنځوس زره یتیمان، کونډې او معلولین له خپلو میاشتنیو مرستو څخه برخمن شوي دي.
نوموړي همداراز زیاته کړه: د شهیدانو او معلولینو چارو وزارت له معلولینو، کونډو او یتیمانو سره د میاشتنیو مرستو د ورکړې په بهیر کې ټول اړخونه په پام کې نیولي او د دغه وزارت له منظور شوې طرحې سره سم هغوی ته میاشتنۍ مرستې ورکړل شوي دي چې په دې ترڅ کې د شهيدانو او معلولينو چارو وزارت له خپلې بوديجې نه نيم ميليارده افغانۍ لګولې دي.
ښاغلي مولوي کلیم الله افغان د خپلو خبرو په ترڅ کې معلولينو او يتيمانو ته د بايومټريک پروسې او هغوى ته د هویت کارټونو د ورکړې يادونه هم وکړه.
په دې غونډه کې د شهیدانو او معلولینو چارو وزارت د دعوت او ارشاد رئیس ښاغلي مفتي عبدالاحد مسعود د دغه ډول روزنیز پروګرامونو جوړول د معلولینو او یتیمانو لپاره ګټور وبلل او د دغه پروګرام له ګډونوالو یې وغوښتل، چې له حرفوي زده کړو څخه په ښه توګه ګټه پورته کړي تر څو د دوی اقتصادي ستونزې او ننګونې حل کړای شي. نوموړي همداراز د یاد روزنیز پروګرام ګډونوال وهڅول تر څو له خپلو استعدادونو څخه په سمه توګه ګټه پورته کړي.
په دې غونډه کې د شهیدانو او معلولینو چارو وزارت د اطلاعاتو او عامه اړیکو مسؤل ښاغلي مفتي فیصل خاموش هم د حرفوي زده کړو پر ارزښت خبرې وکړې او زیاته یې کړه: د یتیمانو او معلولینو د اقتصادي هوساینې لپاره باید د حرفوي زده کړو لا زیاته زمینه برابره شي تر څو یتیمان او معلولیت لرونکي وګړي په مالي برخه کې په ځان بسیا شي.
د دغه پروګرام په ترڅ کې د دارالافتاء و القضأ کارپوه مفتي عزت الله امان وویل چې د دا ډول پروګرامونو ترسره کول د معلولینو او یتیمانو لپاره ګټور دي او د یادو برخو زده کوونکي یې وهڅول چې په دې برخه کې خپلو هڅو ته دوام ورکړي.
په دې غونډه کې د حرفوي زده کړو آمر انجینر خالد فاروقي د یتیمانو او معلولینو لپاره د حرفوي زده کړو په هکله معلومات وړاندې کړل او زیاته یې کړه: په ۱۴۰۱ کال کې د شهیدانو او معلولینو چارو وزارت له خوا شپږ روزنیزې حرفې په پام کې نیول شوې وې چې له هغې جملې څخه یتیمانو او معلولینو ته د حرفوي زدکړو په موخه د (خیاطي، مبایل ترمیم، کمپیوټر او برښنایي وسایلو د ترمیم) په څلورو برخو کې فعالیت پیل کړل شو، او په پام کې ده چې د دو نورو حرفو د زدکړو زمینه به هم برابره شي.
نوموړي ژمنه وکړه چې د حرفوي زدکړو د پروګرام په پای کې به فارغ شوي کسانو ته د کار زمینه برابره کړي.
