د کب نهمه د امنیتي او دفاعي ځواکونو د ملاتړ ملي ورځ ونمانځل شوه
د کب نهمه د امنیتي او دفاعي ځواکونو د ملاتړ ملي ورځ ونمانځل شوه
نن شنبه د (کب میاشتې ۹ نېټه) چې د امنیتي او دفاعي ځواکونو د ملاتړ ملي ورځې سره برابره ده، د شهيدانو او معلولينو چارو د سرپرست وزير پوهنمل حمید الله فاروقي او نورو مسولینو له لوري د یوې غونډې پر مهال ونمانځل شوه.
په پیل کې ښاغلي فاروقي ټولو امنيتي او دفاعي ځواکونو ته د کب د نهمې په ویاړ د مبارکۍ مراتب وړاندې کړه وویل: د افغانستان وسله وال ځواکونه د لوړ مورال او هېوادني احساس خاوندان دي، چې د سیمې په کچه یو بې ساری ځواک ګڼل کېږي او د هېواد، خاورې، ملي حاکمیت، ځمکنۍ بشپړتیا او د ولس ساتنې او دفاع په مقدسه جګړه کې یې سرښندنې او اتلولۍ د ډېرې ستاینې او قدرداني وړ دي.
ښاغلي فاروقي زیاته کړه، چې وسله وال ځواکونه زموږ ویاړونه دي. د خپلو ملي ګټو او ملي ارزښتونو د دفاع په لاره کې ترهګرو او ترورېزم سره لومړۍ کرښه کې په شدیده جګړه بوخت دي او باوري یو، چې د خدای ج په فضل، خپل لوړ مورال او د ولس د دعا په برکت به بريا د دوی په برخه وي.
ښاغلي فاروقي له ټولو خلکو غوښتنه وکړه، چې د ژغورنې له دغو سپېڅلو پرښتو بشپړ ملاتړ وکړي او دښمن سره په سپېڅلې جکړه کې یې یوازې پرېنږدي. زیاته یې کړه، چې د شهیدانو او معلولینو چارو وزارت د تېر په څېر ژمن دي، چې د امنیتي او دفاعي ځواکونو نه هېرېدونکو قربانیو او سرښندونو ته د درناوي په ویاړ یې د شهیدانو کورنیو او معلولینو د هر اړخیز ملاتړ تر څنګ حقوق او امتیازات پر خپل وخت ورکړي، اولادونو ته یې د زده کړو او د ژوند نورې اسانتیاوې او امکانات برابر کړي.
د ښاغلي فاروقي او د وزارت مرستیالانو د غونډې په وروستۍ برخه کې یو شمېر سرتېرو ته د دوی د غوره خدمتونو او زړورتیا د قدردانۍ او ستاینې په موخه د کب د نهمې په مناسبت د ګلونو ګېډۍ او ستاینلیکونه ورکړل.
