د شهیدانو او معلولینو چارو وزارت با صلاحیته پلاوي په نیمروز ولایت کې د یاد وزارت له اړوند ریاست د کړنو او فعالیتونو هر اړخیزه ارزونه وکړه

د شهیدانو او معلولینو چارو وزارت باصلاحیته پلاوی چې مشري یې د شهیدانو او معلولینو چارو وزارت مرستیال ښاغلی شیخ صاحب عبدالحکیم حقاني کوي او د یاد وزارت د دفتر رئیس ښاغلی قاري شاه محمد دوست، د داخلي تفتيش رئيس ښاغلی مولوي احسان الله حقاني، د معلولینو چارو رئیس ښاغلی مولوي عبدالنافع منتفع او د پلانونو د تطبیق او ارزونې  آمر ښاغلی قاري سید اسحاق سعید یې ملتیا کوي د نیمروز ولايت دشهيدانو او معلولينو چارو رياست د فعالیتونو او کړنو څخه په هر اړخيزه توګه ارزونه وکړه.

د دې ارزونې په ترڅ کې د شهیدانو او معلولینو چارو وزارت مرستیال ښاغلي شیخ صاحب عبدالحکیم حقاني ورسره مل پلاوي ته لارښوونه وکړه، تر څو د یاد ریاست اسناد او فورمې په دقیق ډول وڅېړي او په یادو برخو کې د پرتو ستونزو او نیمګړتیاو د حل په موخه دې د نوموړي ریاست مسؤلینو او کارکوونکو ته لازمې لارښوونې وکړي.

د شهیدانو او معلولینو چارو وزارت مرستیال ښاغلي شیخ صاحب عبدالحکیم حقاني په نیمروز ولایت کې د شهیدانو او معلولینو چارو ریاست پر وړاندې د پرتو ستونزو (د یاد ریاست لپاره د اداري ودانۍ نشتون او همدارنګه د یتیمانو، کونډو او معلولیت لرونکو وګړو ته د مرستو د راجلبولو) په موخه د نیمروز ولایت  له والي ښاغلی ملا نجیب الله رفیع سره وکتل.

په یاده کتنه کې د هغه هدایت په هکله چې څه موده وړاندې د ریاست الوزرا د لوموړي مرستیال لخوا د مهاجرينو او راستنېدونکو، اقتصاد، کرنې، اوبو لګولو او مالدارۍ، له طبيعي پېښو سره د مبارزې او سرې مياشتې رياستونو ته استول شوې وو او په هغه کې د یتیمانو او معلولینو لپاره د 25٪ مرستې د تخصیص غوښتنه شوې وه هم یادونه وشوه.

په دې کتنه کې د نیمروز ولايت والي له مسؤلینو څخه وغوښتل ترڅو کونډو  یتیمانو او معلولینو ته د مرستو د ویش په برخه کې جدي پاملرنه وکړي نوموړي همداراز په نیمروز ولایت کې د شهیدانو او معلولینو چارو ریاست ته د اداري ودانۍ د چمتو کولو په برخه کې هم ژمنه وکړه.

 د يادونې وړ ده، چې ياد پلاوي تر دې وړاندې د يتيمانو، کونډو او معلولينو د ستونزو د حل په موخه فراه، هرات، غور، بادغيس او يو شمېر نورو ولايتونو ته سفرونه کړي وو، تر څو د يادو ریاستونو د خدمتونو وړاندې کولو څرنګوالې له نږدې وڅیړي او د نوموړو ولایتونو د شهیدانو او معلولینو چارو ریاستونو پر وړاندې د پرتو ستونزو او ننګونو د حل په برخه کې هراړخیز اقدامات ترسره کړي.