د نظامي شهيدانو او معلولينو ستونزو ته رسيدنه مو لومړيتوب دی
د نظامي شهيدانو او معلولينو ستونزو ته رسيدنه مو لومړيتوب دی
نن د ليندۍ په دوېيمه، د شهيدانو او معلولينو په چارو کې د دولت وزير لعل الدين اريوبي، د نظامي شهيدانو ورثې او معلولينو استازو سره ليدنه وکړه.
د ناستې په پيل کې د نظامي شهيدانو وارثينو او معلولينو استازو له ښاغلي اريوبي سره د حقونو د ځنډ، کارموندنې، زده کړو، استوګنځيو، د نظامي شهيدانو وارثينو او معلولينو ژوند ته د لا پاملرنې او وزارت سره د غوره همغږۍ په برخو کې ستونزې، غوښتنې او وړانديزونه شريک کړل.
د شهيدانو او معلولينو په چارو کې د دولت وزير د ښه راغلاست ترڅنګ له دوی مننه وکړه، چې د امورو او کارونو د لا ښه تنظيم او د شهيدانو کورنيو او معلولينو ستونزو ته د پر وخت رسيدنې په پار يې له ده سره ستونزې او معلومات شريک کړل.
ښاغلي اريوبي وويل: چې د نظامي شهيدانو ورثې او معلولينو ستونزو ته رسيدنه د ياد وزارت لومړيتوب دی او په دې برخه کې د پاموړ لاسته راوړنې هم لري.
د ښاغلي اريوبي په خبره، چې د نظامي شهيدانو او معلولينو قربانۍ د قدر وړ دي او ستونزو ته د رسیدنې سربیره، د يادګار او درناوي په ډول به ورته د کابل په ښار کې يو منار هم جوړ کړي.
ښاغلي اريوبي څرګنده کړه، چې د شهيدانو او معلولينو په چارو کې د دولت وزارت مشرتابه او کارکوونکي ژمن دي، چې د ټولنې ياد قشر لپاره د ژوند ټولې اسانتياوې برابرې کړي او ستونزو ته يې پر وخت رسيدنه وکړي.
