د معلولیت لرونکو وګړو نړیواله ورځ ونمانځل شوه
د معلولیت لرونکو وګړو نړیواله ورځ ونمانځل شوه
د معلولیت لرونکو وګړو نړیواله ورځ د شهیدانو او معلولینو په چارو کې د دولت وزارت له لوري د جلالتمآب جمهور رییس په حضور کې د جمهوري ریاست په سلام خانۍ ماڼۍ کې د ګڼو معلولیت لرونکو وګړو په ګډون ونمانځله.
د دې ورځې د نمانځنې په مراسمو کې د ولسي جرګې او مشرانو جرګې رییسانو، د کابینې غړو، د بهرنیو هېوادونو سفیرانو، د معلولینو د ملاتړو بنسټونو استازو او ګڼو نور خلکو ګډون درلود.
د غونډې په پیل کې د شهیدانو او معلولینو په چارو کې د دولت وزیر ښاغلي لعل الدین آریوبي د افغانستان ټولو معلولیت لرونکو وګړو ته د دې ورځې د مبارکۍ پر مهال وینا وکړه، وویل، چې معلولیت د بشریت اړوند پدیده ده او بدبختانه چې په تېرو څلور لسېزو کې په هیواد کې د جګړو له امله د معلولینو شمېر زیات شوی دی او په هیواد کې تر ۹۰۰ زرو ډېر معلولین موجود دي. دغه قشر ته د تېر په پرتله زیاته پاملرنه شوی، د دوی د رسېدنې پروسه اسانه، همغږي زیاته او تر یوه چتر لاندې راټول شوي دي.
ښاغلي اریوبي زیاته کړه، چې له تعدیل وروسته د معلولینو د حقوقو او امتیازاتو قانون طرحه عدلیې وزارت ته استول شوېده، همداراز د معلولینو د غږ مرکز، ډیټابیس او د معلولیت ملي ستراتېژي ایجاد شوې او د ۲۰۱۹ کال لپاره د معلولینو د نړیوالې ورځې په مناسبت د معلولیت لرونکو وګړو د رهبرۍ او مشارکت لوړولو تر عنوان لاندې د ملګرو ملتونو د شعار د تطبیق لپاره هڅې کوو.
ورپسې د افغانستان د معلولیت لرونکو وګړو د سرتاسري شورا رییس ښاغلي مسعود صافی وینا وکړه او دغه قشر ته د جمهوررئیس له پاملرنې یې مننه وکړه وویل: د معلولینو ډېری غوښتنې عملي شوي او موږ هیله لرو، چې معلولینو ته د غوره روغتیایي خدمتونو د وړاندې کولو، پوهنې، لوړو زده کړو او کارموندنې په برخو کې هم پاملرنه زیاته شي. نوموړي همدا راز د معلولینو د حقونو او امتیازاتو د اجرا او پارا المپیک ته د مالي امکاناتو د برابرولو په برخه کې د حکومت د پاملرنې غوښتنه وکړه.
جلالتماب جمهور رییس محمد اشرف غني د خپلې وینا پر مهال ټولو معلولیت لرونکو وګړو ته د دوی د نړیوالې ورځې مبارکي ورکړه وویل، چې معلولیت لرونکي وګړي بېلابېلې وړتیاوې لري، زموږ فرهنګ باید په وړتیا متمرکز وي او د معلولیت لرونکو وګړو نړیوالې ورځې د نمانځنې مراسمو په ویاړ به په راتلونکي کال کې د معلولینو د وړتیاو پر تقدیر زیات تمرکز وشي.
جمهوررییس زیاته کړه، چې د معلولینو د ستونزو حل دولت، ټولنې او د خصوصي سکتور پورې اړه لري، ټول باید یوه بل ته لاسونه ورکړو او دغه قشر ته بنیادي پاملرنه وکړو. د دولت په دستګاه کې له ساختاري اصلاحاتو پرته د معلولینو د ستونزو حل ممکن نه دی او د امنیتي او دفاعي ارګانونو مسوولینو ته یې لارښوونه وکړه چې د هیواد د شهیدانو او معلولینو د وینو پر وړاندې بې تفاوته نشي او دوی ته نه پاملرنه د منلو وړ نه ده.
جمهوررئیس د معلولینو او شهیدانو وارثینو د ستونزو د حل په خاطر د اداري سیستم او د معلولینو د تګ راتګ لپاره د ودانیو جوړولو د قوانینو پر ساده کولو ټینګار وکړ او وې ویل، معلولین ملي دي په ځانګړې قوم او سیمې پورې تړاو نه لري.
همدارنګه جمهوررئیس غني د افغانستان پر اقتصادي انکشاف ټینګار وکړ او وې ویل، خپل توقعات باید مدیریت کړو او د معلولینو حق باید حقداره معلولینو ته ورسېږي.
د هیواد جمهوررئیس د خپلو خبرو په پای کې په ټولنه کې د معلولینو د فعالې ونډې مننه وکړه او وې ویل، هیله ده د معلول کوچنیانو د پرېشانې ترانې د هوسا، باثبات او قانونمند افغانستان پر بیانونکو ترانو بدلې شي.
د دغو مراسمو په جریان کې جمهوررئیس غني د معلولیت لرونکو وګړو د نقاشۍ او خطاطۍ نندارتون له نږدې وکوت او تنکیو معلولینو هم یوه ترانه ولوسته.
