د شهیدانو او معلولینو چارو په وزارت کې د کونډو مېرمنو د اقتصادي ځان بسیاینې په موخه غونډه جوړه شوه
په هغه غونډه کې چې د شهیدانو او معلولینو چارو وزارت د مالي او اداري چارو عمومي رئيس محترم مولوي کلیم الله افغان په مشرۍ، د کونډو مېرمنو د اقتصادي ځان بسیاینې په موخه د صحي تغذیې مرستندویه مؤسسې له مسؤلینو سره جوړه شوې وه، د ټولنیزو خدمتونو د تنظیم رئیس محترم مولوي ثناءالله فرقاني او د بهرنيو اړیکو او پلان رياست کارکوونکو هم په کې حضور درلود.
محترم مولوي کلیم الله افغان په دې غونډه کې د شهیدانو ورثه وو او معلولینو ته د خدمتونو وړاندې کولو د څرنګوالي او د دې قشر لپاره د میاشتني نغدي مساعدتونو د ورکولو بهیر په اړه مفصل معلومات وړاندې کړل.
همداراز په دې غونډه کې د کونډو مېرمنو لپاره د کورنۍ نانوایي د جوړولو پروژې د پلي کولو پرڅرنګوالي هم خبرې وشوې یاده پروژه به د کابل ښار په لسمه ناحیه کې د کونډو مېرمنو لپاره پلي شي، د دې نوښت اصلی موخه د کونډو مېرمنو ملاتړ او د اقتصادي ځان بسیاینې په برخه کې له هغوی سره د مرستو ترسره کول وښودل شول.
د غونډې په پای کې د صحي تغذیې مرستندویه مؤسسې له مسؤلینو څخه وغوښتل شول چې د دې پروژې سربېره، د معلولینو لپاره هم ورته نور پروګرامونه په پام کې ونیسي، ترڅو هغوی هم د اقتصادي فرصتونو څخه برخمن شي.
