د شهیدانو او معلولینو چارو وزیر محترم الحاج ملا عبدالمجید آخند د سوېلي افریقا هېواد له یو شمېر علماؤ سره په خپل کاري دفتر کې وکتل
په هغه غونډه کې چې د شهیدانو او معلولینو چارو وزارت کې جوړه شوې وه، په هغه کې د یاد وزارت مسلکي او تخنیکي چارو مرستیال محترم الحاج ملا عبدالرزاق آخند، د شهیدانو او معلولینو چارو مرستیال محترم شیخ صاحب عبدالحکیم حقاني، د مالي او اداري چارو عمومي رئیس محترم مولوي کلیم الله افغان، د وزارت د دفتر رئیس محترم قاري شاه محمد دوست، د بشري سرچینو رئیس محترم مولوي محمد موسی صدیقي، د بهرنېو اړیکو او پلان رئیس محترم ملا صدو خان حق شناس او د سوېلي افریقا هېواد یو شمېر علماؤ ګډون کړی وو.
په دې کتنه کې د شهیدانو او معلولینو چارو وزیر محترم الحاج ملا عبدالمجید آخند د سوېلي افریقا هېواد علماؤ ته د ښه راغلاست ویلو تر څنګ د مجاهدینو د سپېڅلي جهاد په اړه معلومات وړاندې کړل او زیاته یې کړه: د جهاد په دوران کې د هېواد ډیرو کورنېو مالي او ځاني قربانۍ ورکړې دي چې نن ورځ د هغوی د قربانېو په برکت په هېواد کې اسلامي نظام حاکم شوی دی.
همدارنګه په دې کتنه کې د شهیدانو او معلولینو چارو مرستیال محترم شیخ صاحب عبدالحکیم حقاني په دې وزارت کې د ثبت شویو یتیمانو، کونډو او معلولینو د کره شمېر په هکله خبرې وکړې او زیاته یې کړه: اسلامي امارت تل هڅه کړې تر څو دې اړمن قشر( د شهیدانو ورثه ؤ او معلولینو) ته لا ډیرې مرستې برابرې کړي تر څو د هغوی په اقتصادي وضعیت کې مثبت بدلون راشي.
نوموړي همداراز وویل: اسلامي امارت هیڅکله هم یتیمان، کونډې او معلولین نه دي هېر کړي او دا خپل ایماني او وجداني مسؤلیت ګڼي چې د هغوی غږ د خیریه بنسټونو او مؤسسو پورې ورسوي تر څو له هغوی سره لا زیاتې مرستې ترسره شي.
هغه همداراز ډاډ ورکړ، کومې مرستې او مساعدتونه چې خیریه بنسټونه او مؤسسې د دې وزارت سره په همغږۍ ترسره کوي هغه به په پوره شفافیت مستحقینو ته ورسول شي.
په ورته وخت کې محترم مفتي عبدالله د سوېلي افریقا هېواد علماؤ په استازیتوب خبرې وکړې او ویې ویل: دا ډیر د ویاړ ځای دی چې نن د هغو کسانو سره لیدنه کوو چې د شهیدانو ورثه ؤ او معلولینو ته خدمتونه وړاندې کوي، هغه همداراز ژمنه وکړه چې خیریه بنسټونه او مؤسسې به وهڅوي تر څو له دې اړمن قشر سره لا ډیرې مرستې ترسره کړي.
د یادونې وړ ده چې د سوېلي افریقا هېواد علمأ په کابل کې د میزان په نوم له یو خیریه بنسټ سره چې یتیمانو، کونډو او معلولینو ته د خوراکي توکو د چمتو کولو په برخه کې فعالیت لري، مالي ملاتړ یې کوي.
