د شهیدانو او معلولینو چارو وزارت د ملي بیرغ ورځ ونمانځله
د شهیدانو او معلولینو چارو وزارت د ملي بیرغ ورځ (د زمري اوومه) د شهیدانو او معلولینو چارو سرپرست او نوماند وزیر پوهنمل حمیدالله فاروقي، معینانو، رییسانو او کارمندانو په شتون کې ونمانځله.
ښاغلي فاروقي د ملي بیرغ ورځ هېوادوالو ته، په ځانګړي توګه د شهیدانو وارثینو او معلولیت لرونکو وګړو ته مبارکي ورکړه او ملي بیرغ یې د عزت، ویاړ او د ملي هویت او ارزښتونو سمبول وګاڼه.
ښاغلي فاروقي څرګنده کړه چې د هر هېواد وګړي خپل ټول عزت، هویت او ویاړ د دوی ملي بیرغ سره تړلی ګڼي او د یووالي، پیوستون او ملي هویت د نښه په توګه یې ساتنه کوي.
ښاغلي فاروقي ټینګار وکړ، په دې کې هېڅ شک نشته چې د افغانستان خلک او ملي ځواکونه د خپلواکۍ، ملي حاکمیت او د هېواد د ځمکنۍ بشپړتیا، په څېر له ملي بیرغ څخه ساتنه، ملي دنده ګڼي او په دې برخه کې د هېواد له دښمنانو څخه یې په کلکه او مېړانه ساتنه کوي.
د شهیدانو او معلولینو چارو سرپرست او نوماند وزیر د هېواد د امنیتي او دفاعي ځواکونو زړورتیا او قربانۍ په ګوته کړې او زیاته یې کړه چې زموږ امنیتي او دفاعي ځواکونه په دې کړکېچن حالت کې د افغانستان له ارزښتونه او درې رنګه بیرغ نه په مېړانه ساتنه کوي.
په پای کې، ښاغلي فاروقي د هېواد سولې او ټیکاو هیله وکړه او هیله یې څرګنده کړه چې چې د سولې هڅې به بریالۍ شي او د ودان او سوله ییز ژوند فرصت به د هېواد د درې رنګه بيرغ تر سیوري لاندې چمتو شي، او موږ به په دې ځمکه کې د لا ډېر پرمختګ، هوساینې او سوکالۍ شاهدان اوسو.
دا غونډه په بېلابېلو برخو ونمانځل شوه، او د نقیب الله امیني، سید جمشید غضنفري او فاروق ځلاند ښکلې دکلمې سره پای ته ورسېده.
