په کونړ ولایت کې پنځه سوه(۵۰۰) تنو یتیمانو، کونډو او معلولیت لرونکو وګړو د خوراکي توکو مرسته ترلاسه کړه
د کونړ ولایت په مرکز او اړوند سرکاڼو ولسوالۍ کې د افغان ماشومانو لپاره د جرمني مرستو په نوم يوې خیریه مؤسسې په مالي ملاتړ او د یاد ولایت د شهیدانو او معلولینو چارو ریاست په همغږۍ پنځه قلمه خوراکي توکي چې په هغې کې اوړه، غوړي، لوبیا، بوره او چای شامل وو، پر پنځه سوه تنو (۵۰۰) مستحقینو باندې په شفاف ډول وویشل شول.
د یادو مرستو د ویش پرمهال د کونړ ولایت د شهيدانو او معلولينو چارو رئيس ښاغلي مولوي عبيد الله حقاني د يادې مؤسسې له مسؤلینو څخه مننه وکړه چې د مستحقو کورنيو لاسنيوی کړی دې.
ديادونې وړ ده چې يادې مؤسسې د کونړ ولایت په غازي آباد او چپې درې ولسواليو کې د خپلو مرستو د ویشلو پر مهال (۲۵) سلنه برخه يتيمانو او معلولينو ته ځانګړې کړې وه.
