د شهیدانو او معلولینو چارو وزارت د ملاتړ او خدمتونو وړاندې کولو مرستیال په کابل کې د ایران سفیر له مرستیال سره وکتل
د شهیدانو او معلولینو چارو وزارت د ملاتړ او خدمتونو وړاندې کولو مرستیال ښاغلي مولوي شیخ عبدالحکیم حقاني په کابل کې د ایران اسلامي جمهوریت د سفیر له مرستیال ښاغلي سید حسن مرتضوي سره په خپل کاري دفتر کې وکتل.
په دې کتنه کې د ایران د اسلامي جمهوریت د سفیر مرستیال ښاغلي سید حسن مرتضوي د افغانستان او ایران د خلکو ترمنځ د ښو تاریخي اړیکو یادونه وکړه. همداراز هغه په دې هېواد کې د وروستيو پېښو دغندلو ترڅنګ د قربانيانو کورنيو ته د تسليت مراتب وړاندې کړل.
د شهیدانو او معلولینو چارو وزارت د ملاتړ او خدمتونو وړاندې کولو مرستیال ښاغلي مولوي شیخ عبدالحکیم حقاني وویل: په تیرو څلویښتو کلنو کې افغانانو ډیر څه له لاسه ورکړي او د ښاغلي مرتضوي څخه یې وغوښتل چي د دغه مظلوم قشر (د شهیدانو وارثینو او معلولیت لرونکو وګړو) د ستونزو غږ د ایران د اسلامي جمهوریت له خیریه بنسټونو سره شریک کړي، تر څو له دغه جګړه ځپلي قشرسره لازمې مرستې وشي.
د ایران د اسلامي جمهوریت د سفیر مرستیال ښاغلي سید حسن مرتضوي هم د دې هېواد له خلکو سره د ایران د خلکو د خیریه موسسو د مرستو ژمنه وکړه.
