د شهیدانو او معلولینو چارو وزارت د مسلکي او تخنیکي چارو مرستیال د بدخشان ولایت مرکز د فیض آباد ښار په نواحیو کې د شهیدانو له یو شمیر وارثینو او معلولینو سره له نږدې وکتل
د شهیدانو او معلولینو چارو وزارت د مسلکي او تخنیکي چارو مرستیال ښاغلي مولوي عبدالرزاق آخند او ورسره مل پلاوي د فیض آباد ښار په ځینو نواحیو کې د شهیدانو له یو شمیر وارثینو او معلولیت لرونکو وګړو سره له نږدې وکتل او د هغوی ستونزې یې واوریدې. په دې لیدنه کې د شهیدانو او معلولینو چارو وزارت د مسلکي او تخنیکي چارو مرستیال د یادو کسانو د ستونزو له اوریدو وروسته له هغوی سره نغدي مرسته هم ترسره کړه.
خلیل الرحمن څلورویشت کلن معلول مجاهد چې د جهاد پر وخت فلج شوی، د اسلامي امارت او په ځانګړې توګه د بدخشان ولایت د شهیدانو او معلولینو چارو ریاست څخه خوښي څرګنده کړه او زیاته یې کړه چې د دې ولایت د شهیدانو او معلولینو چارو ریاست د دوی ستونزو ته پر خپل وخت رسیدګي کړې ده.
د یادولو وړ ده چې د یاد پلاوي د سفر اصلي موخه یتیمانو، کونډو او معلولینو ته د خدمتونو د وړاندې کولو څرنګوالی ښودل شوی او ټاکل شوې ده چې یاد پلاوی به د بدخشان ولایت څخه وروسته د تخار، کندز او بغلان ولایتونو د شهیدانو او معلولینو چارو ریاستونو د خدمتونو د وړاندې کولو څرنګوالی هم په هر اړخیزه توګه وڅیړي.
