د توانبخشي مرکز لپاره دې لومړيتوبونه او اړتياوې تشخيص او هوارې شي
د توانبخشي مرکز لپاره دې لومړيتوبونه او اړتياوې تشخيص او هوارې شي
نن د لړم په ۱۴مه، د شهيدانو او معلولينو په چارو کې د دولت وزير لعل الدين اريوبي د توانبخشي روغتيايي مرکز له مسوولينو سره ناسته وکړه.
د ناستې په پيل کې د توانبخشي روغتيايي مرکز مسوولينو له ښاغلي اريوبي سره په ياد مرکز کې شوي پرمختګونه، لاسته راوړنې، ستونزې او د طبي وسايلو او موادو د کمښت په هکله مالومات شريک کړل.
د شهيدانو او معلولينو په چارو کې د دولت وزير لعل الدين اريوبي په توانبخشي روغتيايي مرکز کې د معلولينو لپاره د غوره خدمتونو پر وړاندې کولو ټينګار وکړ او له چارسنبالو اړوندو چارواکو يې وغوښتل، چې د ياد مرکز لومړيتوبونه او اړتياوې تشخیص او د حل لپاره يې لازم اقدامات وکړي.
ښاغلي اريوبي په دغه مرکز کې د نورو روغتيايي خدمتونو د وړاندې کولو ترڅنګ، د معلولينو لپاره د مصنوعي غړو د جوړولو برخې پر پياوړتيا تاکيد وکړ او ددې مرکز غني او معياري کول يې د وزارت لومړيتوب وباله.
د توانبخشي روغتيايي مرکز، چې د شهيدانو او معلولينو په چارو کې د دولت وزارت په چوکاټ کې د معلولينو لپاره د عمومي داخلې، فزيوتراپي، انديسکوپي، د مصنوعي غړو جوړول، پوزه او غوږونو، سترګو، ستوني او رواني درملنې خدمتونه په وړيا ډول ترسره کوي.
