د شهیدانو او معلولینو چارو وزارت با صلاحیته پلاوي په غور ولایت کې د یاد وزارت له اړوند ریاست د کړنو او فعالیتونو هر اړخیزه ارزونه وکړه
د شهیدانو او معلولینو چارو وزارت مرستیال ښاغلي شیخ صاحب عبدالحکیم حقاني د یو با صلاحیته پلاوي په مشرۍ په غور ولایت کې د نوموړي وزارت له اړوند ریاست له فعالیتونو او کړنو هر اړخیزه ارزونه وکړه.
د شهیدانو او معلولینو چارو وزارت باصلاحیته پلاوی چې مشري یې د شهیدانو او معلولینو چارو وزارت مرستیال ښاغلی شیخ صاحب عبدالحکیم حقاني کوي او د یاد وزارت د دفتر رئیس ښاغلی قاري شاه محمد دوست، د داخلي تفتيش رئيس ښاغلی مولوي احسان الله حقاني، د معلولینو چارو رئیس ښاغلی مولوي عبدالنافع منتفع او د پلانونو د تطبیق او ارزونې آمر ښاغلی قاري سید اسحاق سعید یې ملتیا کوي.
َښاغلي شیخ صاحب عبدالحکیم حقاني د دغه سفر په ترڅ کې د غور ولایت د شهیدانو او معلولینو ریاست مسؤلینو او کارکوونکو ته په وینا کې وویل: په اسلامي امارت کې سرغړونه، تزویر او جعل کول هیڅ ځای نه لري او هیچاته به هم دا فرصت ورنه کړل شي.
نوموړي د خپلو خبرو په ترڅ کې د معلولینو او یتیمانو د ثبت او راجستر د څرنګوالي په اړه هر اړخیزې خبرې وکړې او ټينګار يې وکړ، د یتیمانو او معلولینو د تثبیت په پروسه کې باید د شهيدانو او معلولينو چارو وزارت له طرزالعمل څخه په پوره توګه ګټه واخیستل شي.
د دغه سفر په ترڅ کې د شهیدانو او معلولینو چارو وزارت مرستیال د غور ولایت له یو شمیر معلولینو او د شهیدانو له وارثینو سره هم وکتل او هغوی ته یې ډاډ ورکړ چې د هیچا حقوق او امتیازات به نه ضایع کیږي او د دوی حقوق او امتیازات به د اصولو سره سم، په شفاف ډول او پر وخت ورکول کیږي.
ښاغلي شیخ صاحب عبدالحکیم حقاني د غور ولایت د شهیدانو او معلولینو چارو ریاست پر وړاندې د پرتو ستونزو او ننګونو له اوریدنې وروسته د غور ولایت له والي ښاغلي ملا احمد شاه دین دوست سره وکتل.
په یاده کتنه کې د شهیدانو او معلولینو چارو وزارت مرستیال وویل: د عالیقدر امیرالمؤمنین شیخ القرآن و الحدیث هبت الله اخندزاده حفظه الله د حکم له مخې باید په ولایتونو کې د شهیدانو او معلولینو چارو ریاستونو د اداري کارونو د مخته وړلو په موخه معیاري او مناسبې ودانۍ ددوی په اختیار کې ورکړل شي.
نوموړي زیاته کړه: په غور ولایت کې د شهیدانو او معلولینو ریاست مناسب ځای ته اړتیا لري همدارنګه نوموړي د خبرو په ترڅ کې وویل په دې ولایت کې باید د اړوندو ادارو مسؤلین د شهیدانو وارثینو او معلولینو ته د مرستو په برخه کې جدي پاملرنه وکړي.
په ورته وخت کې د غور والي د کرنې، اقتصاد، کار او ټولنیزو چارو، طبیعي پېښو پر وړاندې د مبارزې، د کلیو پراختیا، سرې میاشتې او عامې روغتیا ریاستونو رئیسانو او مسؤلینو ته لارښوونه وکړه چې یتیمانو او معلولینو ته د مرستو د ویش په برخه کې جدي پاملرنه وکړي.
همدارنګه د يادو ادارو رئيسانو او مسؤلينو ژمنه وکړه، چې د شهيدانو له وارثینو او معلولينو ته به د مرستو په رسونۍ کې پوره همکاري کوي.
د یادې غونډې په پای کې د غور ولایت والي ښاغلي ملا احمدشاه دین دوست هم ژمنه وکړه چې د یاد ولایت د شهیدانو او معلولینو چارو ریاست پر وړاندې د پرتو ستونزو او ننګونو د حل په برخه کې به جدي پاملرنه وکړي.
