د ښځو نړیوالې ورځې (مارچ ۸) په ویاړ د شهیدانو او معلولینو په چارو کې د دولت وزیر ښاغلي لعل الدین آریوبي پیغام

د ښځو نړیوالې ورځې (مارچ ۸) په ویاړ د شهیدانو او معلولینو په چارو کې د دولت وزیر ښاغلي لعل الدین آریوبي پیغام 
د افغانستان ټولو پتمنو او مبارزو په ځانګړې معلولیت لرونکو ښځو ته د دوی د پرتمینې ورځې مبارکي وایم!
پرته له شکه، چې افغان زړورې ښځې په خورا ننګونو حالاتو کې خپلو موخه ته د رسېدو لپاره د مبارزې کلک هوډ لري او د هېواد په بیارغونه، پرمختګ او د ولس د سوکالۍ په برخه کې افغان نارینه قشر سره اوږه په اوږه کار کوي.  
افغان ښځې که څه هم ګڼو ستونزو سره مخ او د جګړې اصلي متضررې دي، خو بیا هم نړۍ ته د غیرت، همت، انسانیت او مبارزې ښې بېلګې دي، دوی په ډېره کمه موده، لږو امکاناتو او اسانتیاوو د سیاست، زده کړو، ورزش، ټکنالوژۍ او نورو برخو کې د حساب وړ لاسته راوړنې لري. 
د حکومت او ټولنې د فرد، فرد مسولیت دی، چې افغان ته د ژوند د مناسبو کاری، زده کړو، ورزش، ټولنیز، سیاسي، فرهنګي او اقتصادي فرصتونو او شرایطو د برابرولو په موخه هر اړخیزې هلې ځلې وکړي. د دې ترڅنګ اړینه ده، چې پر یوې متمدنې ټولنې د بدلېدو لپاره د ښځو پر وړاندې د شته خنډونو، زورزیاتیو، تاوتریخوالي او ټولنیزې نابرابرې پر ضد مبارزه وکړو. 
د شهیدانو او معلولینو په چارو کې د دولت وزارت رهبري معلولیت لرونکو مېرمنو ته د تېر په څېر د زده کړو او کار موندنې فرصتونو برابرولو ته ژمنه ده او په دې برخه کې به خپلې هیڅ ډول هڅې ونه سپموي.  
د یوه ملت په پرمختګ کې ښځې اغېزناک نقش لري، راځئ احترام یې وکړو او په ټولو چارو کې برابره ونډه او مسولیت ورکړو!
په درنښت 
لعل الدین آریوبي 
د شهیدانو او معلولینو په چارو کې د دولت وزیر