د شهیدانو او معلولینو چارو وزارت د مالي او اداري چارو عمومي رئیس، د عزیزي بانک د اړوندو څانګو له مسئولینو سره وکتل
د شهیدانو او معلولینو چارو وزارت د مالي او اداري چارو عمومي رئیس ښاغلي مولوي کلیم الله افغان د عزیزي بانک د معاشاتو د څانګې له مسؤل ښاغلي ذکي نوري او راغلي پلاوي سره په خپل کاري دفتر کې وکتل.
په دې کتنه کې د یتیمانو او معلولیت لرونکو وګړو د حقوقو د ورکړې د اسانتیاو پر برابرولو، د بودیجې پر ځاې او اغیزمن ډول مصرفولو په هکله خبرې اترې وشوې، همداراز د دې کتنې په ترڅ کې معلولیت لرونکو او یتیمانو ته د بانکي اکونټونو د جوړونې د هوکړه لیک په اړه هم څرګندونې وشوې.
د مالي او اداري چارو عمومي رئیس ښاغلي مولوي کليم الله افغان د عزيزي بانک له مسوولينو څخه وغوښتل چې لرې پرتو سیمو، ولسوالېو او همداراز ولایتونو کې، دې مظلوم قشر ( معلولیت لرونکو او یتیمانو کورنېو) ته د حقوقو د ورکړۍ په برخه کې لازمې اسانتياوې برابرې کړي.
همدارنګه د عزیزي بانک د معاشاتو د څانګې مسؤل ښاغلي ذکي نوري هم یتیمانو او معلولینو ته د ښو او ګټورو خدمتونو وړاندې کول انساني او وجداني دنده وبلله، او د پوره همکارۍ ژمنه یې وکړه.
