ژمن يو چې د شهيدانو ورثې او معلولينو لپاره رڼه او هر اړخيز خدمات وړاندې کړو
ژمن يو چې د شهيدانو ورثې او معلولينو لپاره رڼه او هر اړخيز خدمات وړاندې کړو
نن شنبه د سلواغې په ۱۸مه، د شهيدانو او معلولينو چارو سرپرست وزير ښاغلي حميدالله فاروقي، د معلولينو ټولنو د انسجام او همغږۍ رهبرۍ غړو سره وکتل او د هغوی ستونزې، غوښتنې او وړاندیزونه يې واوريدل.
د ناستې په پيل کې د معلولينو په استازيتوب ښاغلي ملک محمد ملکزاده د معلولينو پر وړاندې د موجوده ستونزو؛ لکه د سرپناه نشتون، د قانون نه تطبيق، کارموندنې، زدکړو او تحصيلي بورسونو برابرول، د ملي فدراسيون جوړول، او نورو بېلابېلو مسايلو يادونه وکړه او د وزارت له مشرتابه يې د حل غوښتنه وکړه.
د ناستې نورو ګډونوالو هم خپل نظرونه او ليدلوري له ښاغلي فاروقي سره شريک کړل او هيله يې وکړه، چې ستونزو ته يې رسيدنه وشي.
د شهيدانو او معلولينو چارو سرپرست وزير ښاغلي پوهنمل، حميدالله فاروقي د ټولو ناخوالو مور جګړه وګڼله وويل: چې د شهيدانو ورثې او معلولينو ستونزو ته رسيدنه يې مسوليت دی او ژمنه يې وکړه چې د ټولنې دی درديدلي قشر لپاره به رڼه او هر اړخيز خدمات وړاندې کوي.
دده په خبره، چې ولسمشر د شهيدانو ورثې او معلولينو په اړه له ټولو ستونزو خبر دی او د هغه له لارښوونو سره سم به د ياد قشر د ستونزو هواري او غوره خدمتونو د وړاندې کولو په برخو کې جدي او قاطع اقدامات ترسره کړي.
نوموړي په پای کې له دوی څخه هيله وکړه، چې د ملي شورا له مخې د تحصن خيمې لرې کړي او له وزارت سره په ګډه، همغږۍ او همکارۍ عدالت غوښتنې ته په يو غږ دوام ورکړي.
