معلوماتو ته د شهیدانو د ورثې او معلولینو د اسانه لاسرسي په موخه د وزارت ویب سایټ موبایل اپلکېشن ته بدلېږي

معلوماتو ته د شهیدانو د ورثې او معلولینو د اسانه لاسرسي په موخه د وزارت ویب سایټ موبایل اپلکېشن ته بدلېږي

د شهیدانو او معلولینو چارو وزیر لعل الدین آریوبي او د رهبرۍ غړو ته د وزارت ویب سایټ د موبایل اپلیکېشن بڼې ته د بدلولو د کار د لومړي پړاو په اړه معلومات وړاندې شوه.

دغه نوښت د اپلیکېشن د پراختیا (App Development) څانګې متخصص رفعت سلطان له لوري د شهیدانو کورنیو او معلولیت لرونکو وګړو ته د یوه خدمت په توګه په رضاکاره ډول ترسره کېږي، چې نن یې د خپل څو ورځني کار پایله د یوه پرزنټېشن په بڼه د وزارت رهبرۍ د نظرونو او وړاندیزونو د اخیستو په موخه وړاندې کړه.

ښاغلي رفعت سلطان د پرزنټېشن پر مهال وویل، چې په موبایل اپلیکېشن د وزارت د ویب سایټ د بدلولو موخه یې معلوماتو ته د یاد قشر د لاسرسي اسانتیا او له خپلو اړوندو چارو پر وخت خبرول دي. سلطان زیاته کړه، چې د ویب سایټ د موبایل اپلیکېشن بڼه به د معلوماتو له بشپړولو او هر اړخیزه کولو وروسته ( پلی سټور او اپ سټور) ته اپلوډ کړي، تر څو یې معلولین او د شهیدانو وراثین خپلو ګرځنده موبایلونو ته ډانلوډ او له معلوماتو برخمن شي.

د شهیدانو او معلولینو چارو وزیر ښاغلي لعل الدین آریوبي له رفعت سلطان نه مننه وکړه، چې د هېوادني احساس له مخې په رضاکارانه ډول د شهیدانو ورثې او معلولینو ته دغه بې ساری اقدام ترسره کوي. زیاته یې کړه، چې په لنډو ورځو کې د خپل کار پایله د وزارت رهبرۍ سره شریکول د ستاینې او قدرداني وړ ده. د دې تر څنګ یې څرګنده کړه، چې د غوره لاسرسي په موخه باید د ټولو نظرونه په یاد اپلیکیشن کې ځای پر ځای شي.

ښاغلي آریوبي د وزارت ټولو برخو ته لارښوونه وکړه، چې د یاد اپلیکېشن د چارو د بشپړتیا لپاره دې د هر ډول اړینو مواد د چمتو کولو برخه کې ښاغلي سلطان سره مرسته او همکاري وشي، تر څو دغه اپلیکشن ډېر ژر د شهیدانو د ورثې او معلولینو په واک کې ورکړل شي.

د یادونې وړ ده، چې د وزارت وېب سایټ د موبایل اپلیکېشن ته بدلول یو بې ساری نوښت دی، چې د معلوماتو په رسولو او چټکتیا کې به ډېره مرسته وکړي.