د کابل ولایت د ملکي او نظامي شهیدانو ورثې د اسنادو او وثیقو څېړنه بشپړه شوه
د کابل ولایت د ملکي او نظامي شهیدانو ورثې د اسنادو او وثیقو څېړنه بشپړه شوه
د شهیدانو او معلولینو په چارو کې د دولت وزیر لعل الدین آریوبي د ملکي او نظامي شهیدانو ورثې د اسنادو او وثیقو د څېړنې کمېسیون غړو سره وکتل.
د یاد کمېسیون غړو، چې د سترې محکمې، لویې څارنوالۍ، ملي امنیت عمومي ریاست، معلوماتو او مرکزي احصایې ملي ادارې، عامې روغتیا وزارت او د شهیدانو او معلولینو په چارو کې د دولت وزارت استازي پکې شامل دي، خپل کاري راپور وړاندې کړ وویل: د کابل ولایت د ملکي او نظامي شهیدانو ورثې د ۱۳۸۰ څخه تر ۱۳۹۹ کال پورې د ټولو اسنادو څېړنه یې بشپړه کړې ده، تایید شوي اسناد به ډېتابیس کړي، هغه اسناد چې نیمګړتیا لري بیا کتنه به یې وشي، د رد شويو اسنادو حقوق به ودرول شي او کوم اسناد چې تایید شوي حقوق به یې ورکړل شي.
د یاد کمېسیون غړو زیاته کړه، چې د کابل ولایت د معلولینو د اسنادو څېړنه یې هم پیل کړې ده، تر اوسه دوه زره اسناد څېړل شوي او په پاتې هغو به چټک کار وکړي. دوی همدا راز له ۱۳۸۰ کال د وړاندې شهیدانو ورثې د اسنادو د څېړنې په اړه د وزارت مقام د لارښوونې غوښتنه وکړه.
د شهیدانو او معلولینو په چارو کې د دولت وزیر ښاغلي لعل الدین آریوبي د یاد کمېسیون د غړو د فعالیت مننه او ستاینه وکړه وویل: له ۱۳۸۰ د وړاندې کلونو د شهیدانو د ورثې د اسنادو له ارزونې او کتنې وروسته به په دې اړه پرېکړه وشي.
ښاغلي آریوبي ټینګار وکړ، چې د کابل ولایت د معلولینو د اسنادو د څېړنې چارې هم باید چټکې او د پاتې اسناد څېړنه ژر بشپړه شي.
د یادونې وړ ده، چې د ټول هېواد په کچه د شهیدانو د ورثې او معلولینو د اسنادو او وثیقو څېړنه د جمهور رییس د ځانګړي حکم پر بنسټ پیل شوې چې د یادو ادارو د استازو په ګډون هر ولایت ته جلا کمیسیون جوړ شوی او د څېړنې چارې پر مخ وړي.
