د شهیدانو او معلولینو چارو وزیر پوهنمل حمیدالله فاروقی او ور سره مل پلاوي ننګرهار ولایت ته سفر وکړ
د شهیدانو او معلولینو چارو وزیر پوهنمل حمیدالله فاروقی او ور سره مل پلاوي ننګرهار ولایت ته سفر وکړ
د شهیدان او معلولینو چارو وزیر د ولایتي سفرونو په ترڅ کې، د شهیدانو د وارثینو او معلولیت لرونکو وګړو د ژوند د سطحې معلومولو او د هغوی ستونزو ته د رسیدنې په موخه ننګرهار ولایت ته سفر وکړ، چې د ولایتي چارواکو او خلکو له تود هرکلي سره مخ شول.
په دغه سفر کې ښاغلي فاروقی د ننګرهار له محترم والي، د شهیدانو کورنیو غړو، معلولیت لرونکو وګړو او جګړو ځپلو ځوانانو او مشرانو سره په جلا جلا ډول لیدنې وکړې.
د ننګرهار ځوان والي ضیاالحق امرخیل له ښاغلي فاروقی څخه مننه وکړه چې د ننګرهار جګړو ځپلو، د شهیدانو کورنیو له غړو او معلولیت لرونکو وګړو د وضعیت له نږدې لیدو په موخه ننګرهار ولایت ته راغلی او د هغوی د ژوند ښه کولو په پار هلې ځلې کوي.
نوموړي د شهیدانو او معلولینو په چارو کې د وروستیو پرمختګونو لکه ( د سیسټم برېښنايي کول، د منظمې پالیسۍ جوړول، د بروکراسۍ کمول، له فساد سره مبارزه، د اسنادو بیا څېړنه او شفافیت او له یوه ادرس نه د اسنادو ارزونه) یې وستایل او په چارو کې یې ورته د لا بریالیتوب هیله وکړه.
د شهیدانو او معلولینو چارو وزیر پوهنمل حمیدالله فاروقی د ننګرهار ولسونو له تود هرکلي او مېلمه پالنې مننه وکړه او د وزارت اړوند ولایتي ادارو ته یې سپارښتنه وکړه، چې د شهیدانو وارثینو او معلولیت لرونکو وګړو د کلنیو امتیازاتو د پر وخت ورکونې او ستونزو ته د رسیدنې تر څنګ، باید د هغوی د ځان بساینې، کارموندنې او زده کړو زمینو د برابرولو په برخو کې هم جدي کار او پاملرنه وکړي.
