د جمهوري ریاست عالي مقام سره به د وزارت د کړنو، لاسته راوړنو او ستونزو راپور شریک شي
د جمهوري ریاست عالي مقام سره به د وزارت د کړنو، لاسته راوړنو او ستونزو راپور شریک شي
د شهيدانو او معلولينو چارو سرپرست وزير پوهنمل حميدالله فاروقي د وزارت د رهبرۍ پلاوي سره ناسته کې وویل چې د جمهور رییس د لارښوونې سره سم دې د شهیدانو او معلولینو چارو وزارت د کړنو، لاسته راوړنو، ستونزو او راتلوونکو پلانونو راپور په بېړني ډول چمتو او د جمهوري ریاست عالي مقام سره شریک شي.
ښاغلي فاروقي په ولسمشرۍ ماڼۍ کې جمهور رییس سره د شهیدانو د ورثې او معلولینو د ستونزو او نظرونو اخیستو لویه غونډه بریالۍ وګڼله او د ښه ترسراوي له کبله یې د وزارت له مسولینو مننه وکړه زیاته یې کړه: د شهيدانو ورثې او معلوليت لرونکو وګړو ته د جمهور رییس د پاملرنې او ارزښت پر بنسټ دې ددې ادارې د کړنو، پرمختګونو، اړتياوو، ستونزو او وړانديزونو لنډ راپور ترتیب او د جمهوري ریاست عالي مقام سره دې شریک شي، تر څو جمهور رییس د همدغه راپور پر بنسټ د کابينې په راتلوونکې ناسته کې د وزارت کړنې وارزوي او د شته ننګونو او ستونزو د حل پریکړه وکړي.
ښاغلي فاروقي نړيوالو مرستندويه بنسټونو او اړوندو دولتي ادارو سره د همغږۍ او همکارۍ پر زياتوالي ټينګار وکړ او په دې اړه یې د مشخص پلان د جوړولو لارښوونه وکړه.
د ناستې په پای کې د جمهوري رياست عالي مقام ته د راپور ترتیبولو په موخه اووه کسيزه کميټه رامنځته شوه، چې په بېړني ډول به هر اړخیز راپور چمتو او د وزارت د مشرتابه له کتنې وروسته به عالي مقام ته واستول شي.
