د نظامي شهيدانو درنې ورثې او معلوليت لرونکو وګړو لپاره د ICCR د 324 سيټ بورسونو د ورکړې په تړاو خبرتيا!

د نظامي شهيدانو درنې ورثې او معلوليت لرونکو وګړو لپاره د ICCR د 324 سيټ بورسونو د ورکړې په تړاو خبرتيا!

په کابل کې ميشت د هندوستان جمهوري رياست سفارت د هند په بېلا بېلو پوهنتونونو کې د (2021-2022) کال په بهير کې د نظامي شهيدانو درنې ورثې او معلولينو لپاره د فرهنګي اړيکو د شورا په چوکاټ کې د ليسانس په کچه د (324) تحصيلي بورسونو د ورکړې اعلان وکړ.

نو پر همدې بنسټ هغه د نظامي شهيدانو درانه وارثين او معلوليت لرونکي وکړي چې په لاندينيو شرايطو برابر وي، ژر تر ژره د نوملیکنه وکړي:

۱. له انګليسي ژبې سره بلدتيا.

۲. نوماند بايد له خپلې ليوالتيا سره سم د 500 کليمو درلودونکی متن وليکي، څو پر بنسټ يې له انګليسي ژبې سره د بلدتيا کچه معلومه شي او همدارنګه د ايليټس او ټافل سند لرونکي نوماندان دې هم خپل سندونه ورسره يو ځای کړي‌.

۳. اړينه ده چې نوماند د خپلې خوښې رشتې په تړاو په انګليسي ژبه تحقیقي مقاله وليکي او له نورو تحصيلي اسنادو سره يو ځای يې له اړونده پوهنتون سره د لاندې پورټال له لارې شريکه کړي.

(http://www.a2ascholarship.iccr.gov.in)

۴. د ليسانس لپاره د نوماند عمر بايد د 18-30 کلونو ترمنځ وي.

۵. د بوروسونو غوښتنې فورمې او روغتيايي فورمې باید د ICCR سايټ فارمټ (http://www.a2ascholarship.iccr.gov.in) سره سمې ډکې کړئ.

۶. د پوهنتونونو او تحصيلي بنسټونو نوملړ او نور اړين معلومات، چې نوماندان کولی شي داخله پکې وکړي، په ياد شوي پورټال کې موجود او د لاسرسي وړ دي‌.

۷. د پوهنتون فيس او د اوسيدنې ټول مصارف د بورسونو ورکونې مرجع په غاړه دي.

۸. د نوماندانو لپاره د الوتکې د ټيکټ مصارف په دوه پړاوونو کې؛ يو د کورس په پيل او دويم له کورس نه په بريالي ډول تر فراغت او صحي بيمې وروسته د بورس ورکوونکې مرجع لخوا ورکول کېږي.

۹. فورمې او نور اسناد چې اصل يې په انګليسي ژبه نه وي، نه منل کېږي‌.

۱۰. ليوال زدکړيالان خپلې فورمې په آنلاین ډول په دغه پورټال (http://www.a2ascholarship.iccr.gov.in) کې ډکولی شي.

۱۱. نوماندان بايد په مستقیم ډول خپل غوښتنليکونه له بياځلې کتنې وروسته د غوښتنې فورمې سره ضميمه او تسليم شي.

۱۲. ليوال زدکړيالان بايد د غوښتنې فورمې په انلاين ډول ډکې، د تحصيلي اسنادو کاپي او د معتبرو روغتونونو او لابراتوارونو څخه د روغتيايي اصلي سرټيفيکټونو سره يو ځای يې په کابل کې د هندوستان سفارت ته د May تر 5مې نيټې پورې تسليم کړئ.

۱۳. نومليکنه د روان ميلادي کال د مارچ مياشتې له 15مې نيټې پيلېږي او د اپريل تر 15مې نيټې دوام لري او غوښتنليکونه مخامخ اړوند تحصيلي بنسټ ته لېږل کېږي.

۱۴. د انګليسي ژبې ازموينه او مرکه په انلاين ډول له ټاکلو او انتخاب مخکې د اړوند پوهنتون او انسټیټیوټ لخوا اخيستل کېږي.

۱۵. د اړونده تحصيلي بنسټونو له لوري د نه منل شوو زدکړيالانو ته په مستقيم ډول خبر ورکول کېږي او برياليو زدکړيالانو ته په کابل کې د هند سفارت له لوري د منلو ليک ورکول کېږي.

۱۶. همدارنګه په يادښت کې راغلي، چې ورپيژندل شويو نوماندانو څخه په کابل کې د هند سفارت لخوا د انګليسي ژبې ازموينه نه اخيستل کېږي.

۱۷. د نوماندانو منل او ردول په مستقيمه توګه د اړونده پوهنتون او انسټيټيوت له لوري ترسره کېږي.

۱۸. همدارنګه د هندوستان سفارت ټينګار کوي، چې په شرايطو برابر نوماندان دې خپل ټول اړين اسناد او غوښتنليکونه په دغه (http://www.a2ascholarship.iccr.gov.in) پورټال کې اپلوډ کړي.

يادونه: هغه کسان چې په نومليکنه کې ستونزې ولري او يا انټرنيټ ته لاسرسي ونه لري، کولی شي چې د ټولو تحصيلي اسنادو او انګليسي ژباړې سره يو ځای د شهيدانو او معلولينو چارو وزارت، کوم چې د هوايي ډګر پر عمومي سړک د قلعه حياط تمځای سره موقيعت لري، تشريف راوړي.

هغه کسان چې په ولايتونو کې دي او په فزيکي ډول وزارت ته تشریف نه شي راوړلی، کولی شي چې خپل مکمل اسناد د وزارت ايميل ادرس (Departmentofsocialmmd@gmail.com) ته راوليږي.

د لا زياتو معلوماتو لپاره له (1717) او (0707000029) سره اړيکه ونيسئ.