د شهیدانو او معلولینو چارو وزارت د مقام د دفتر په ریاست کې اداري غونډه ترسره شوه
د شهیدانو او معلولینو چارو وزارت د مقام د دفتر رئيس محترم مولوي شاه محمد دوست په مشرۍ په یاد ریاست کې د چارو د لاښه والي او د لازمې همغږۍ د تأمین په موخه اداري غونډه ترسره شوه، چې په هغه کې د ولایتونو د انسجام او همغږۍ آمر محترم مولوي عبدالله، د اسناد او ارتباط آمر محترم مولوي ولي الله، د وزارت د مقام سکرتر محترم قاري نورمحمد نوراني او د اړوندو څانګو کارکوونکو ګډون کړی وو.
په دې غونډه کې محترم مولوي شاه محمد دوست یتیمانو، کونډو او معلولینو ته د منظم، پر وخت او اغېزمنو خدمتونو د وړاندې کولو په اړه مفصلې خبرې وکړې او ټینګار یې وکړ چې له مراجعینو سره دې په درناوي او مهربانۍ چلند وشي، هغوی ته دې لازمې اسانتیاوې برابرې او ستونزو او غوښتنو ته دې پر وخت او د زړه له اخلاصه رسیدګي وشي.
د شهیدانو او معلولینو چارو وزارت د مقام د دفتر رئیس له ټولو کارکوونکو وغوښتل، چې د خپلو سپارل شویو مسؤلیتونو په ترسره کولو کې بشپړه همغږي، همکاري او د مسؤلیت احساس ولري او د یتیمانو، کونډو او معلولینو اړوند چارو ته دې له خنډ او ځنډ پرته رسیدګي وکړي.
د غونډې په پای کې ګډونوالو هم د کاري بهیر د لا ښه والي په اړه خپل نظرونه او وړاندیزونه شریک کړل او د محترم مولوي شاه محمد دوست لخوا هغوی ته په اړوندو برخو کې لازمې لارښوونې وشوې.
