د شهیدانو او معلولینو چارو وزارت د رهبرۍ شورا غونډه ترسره شوه
د شهیدانو او معلولینو چارو وزارت د رهبرۍ شورا غونډه د یاد وزارت د سرپرست وزیر، ښاغلي ملا عبدالمجید آخند په مشرۍ، د تخنیکي او مسلکي چارو مرستیال ښاغلي مولوي عبدالرزاق آخند، د شهیدانو او معلولینو چارو مرستیال ښاغلي شیخ صاحب عبدالحکیم حقاني، د مالي او اداري چارو عمومي رئیس ښاغلي مولوي کلیم الله افغان او د اړوندو څانګو د رئیسانو په شتون کې ترسره شوه.
د یادې غونډې موضوعات چي د شهیدانو او معلولینو چارو وزارت د دفتر رئیس ښاغلي قاري شاه محمد دوست لخوا غونډې ته وړاندې کړل شول په هغې کې د تیر انقلاب او اوسني نظام د کونډو، یتیمانو او معلولیت لرونکو وګړو د شمېر په هکله بحث وشو، چې د اټکل له مخې په ټول هېواد کې د (۷۰۰) څخه تر (۸۰۰) زرو په شاوخوا کې د تیر انقلاب او اوسني نظام کونډې، یتیمان او معلولیت لرونکي وګړي شتون لري، په همدې موخه د کوڼدو، یتیمانو او معلولینو د کره شمېرې او بشپړ معلوماتو د راټولولو په موخه د معلولینو او شهیدانو چارو ریاستونو ته دندې وسپارل شوې تر څو په دې هکله معلومات راټول او چمتو کړي . همداراز په یاده غونډه کې د یتیمانو وکیلانو لخوا د یتیمانو د حقوقو د ورکړې پر موضوع هم بحث وشو چې په پام کې ده د یتیمانو وکیلانو له خوا د حقوقو د ورکړې پروسه په مرکز او ولایتونو کې د شهیدانو او معلولینو چارو وزارت د پلاوي لخوا په هر اړخیز ډول وڅیړل شي تر څو د یتیمانو د حقوقو له ضایع کیدلو څخه مخنيوی وشي.
د یادونې وړه ده چې د رهبري شورا په دې غونډه کې د شهیدانو او معلولینو چارو وزارت د ډیتابیس په سیسټم کې د یتیمانو او معلولینو د ثبت د تکراریدو د مخنیوي په موخه هم خبرې اترې وشوې او په دې موخه پلاوی وټاکل شو تر څو یادې ستونزې ته د رسیدنې په موخه د دې برخې عملي چارې د مرکز او جوزجان ولایت څخه پیل کړي.
