د شهیدانو او معلولینو چارو سرپرست وزیر د اسلامي همکاریو سازمان له ځانګړي استازي سره وکتل.
د شهیدانو او معلولینو چارو وزارت سرپرست وزیر ښاغلي ملا عبدالمجید آخند په هیواد کې د اسلامي همکاریو د سازمان د سر منشي ځانګړي استازي ښاغلي طارق علي بخیت سره وکتل.
په دې کتنه کې ښاغلي طارق علي بخیت د روغتیا, پوهنې او روزنې په برخو کې د اسلامي همکاریو د سازمان د فعالیتونو او مرستو یادونه وکړه او زیاته یې کړه: د دې سازمان غړي هېوادونه د زیانمنو افغانانو لپاره همکارۍ ته ژمن دي او د دې هېواد له خلکو سره مرسته د دوی په لومړیتوب کې دی.
د شهیدانو او معلولینو چارو وزارت سرپرست وزیر ښاغلي ملا عبدالمجید آخند د یتیمانو، معلولیت لرونکو وګړو او کونډو د ستونزو او ننګونو په اړه خبرې وکړې او دوې ته یې د پوهنې، روغتیا، خوراکي توکو ته د لاسرسي او برابرولو په برخو کې د لا زیاتو مرستو غوښتنه وکړه. سرپرست وزیر همدارنګه د معلولیت لرونکو وګړو لپاره د مصنوعي غړو د جوړونې په برخه کې هم د مرستې غوښتنه وکړه.
ښاغلي طارق علي بخیت له معلولیت لرونکو وګړو، یتیمانو او کونډو سره د مرستو پر برابرولو د ټینګار ترڅنګ وویل چې د دغې زیانمن شوې قشر ستونزې به د دې سازمان د غړو هېوادونو له مرستندویه بنسټونو سره شریکې کړي او له هغوې څخه به وغواړي چي دغو زیانمنو وګړو سره د لازمې همکارۍ او د یتیمانو او معلولینو لپاره د مرستو ټولولو په موخه ځانګړې صندوق جوړ کړي.
