د شهيدانو او معلولينو په چارو کې د دولت وزير د معلولينو له يو شمېر استازو سره وکتل او د هغوی ستونزې او غوښتنې يې واورېدې
د شهيدانو او معلولينو په چارو کې د دولت وزير د معلولينو له يو شمېر استازو سره وکتل او د هغوی ستونزې او غوښتنې يې واورېدې
پنجشنبه د مرغومې په ۱۸مه، د شهيدانو او معلولينو په چارو کې د دولت وزير لعل الدين آريوبي د معترضو معلولينو استازو سره وکتل او د معلولينو د عرفو، استوګنځيو، کارموندنې، زدکړو، د برېښنايي پېژندپاڼو د وېش، د قانون تعديل او د معاشونو د ورکړې په تړاو يې د هغوی غوښتنې او وړانديزونه واريدل.
ښاغلي آريوبي د دوی له غوښتنو او وړانديزونو وروسته وويل: چې له اړونده دولتي ادارو سره د شويو هوکړه ليکونو د تطبيق بهير له نږدې څاري او ټولې مسولې ادارې يې پر پلې کولو کې يو شان مسووليت لري.
نوموړي څرګنده کړه، چې د کابل ښاروالي د معلولينو د عرفو د تخريب لپاره بايد مناسب بديل ولري او له وزارت سره به د شوې هوکړې له مخې د عمل يو کلن پلان هم شريکوي.
ښاغلي آريوبي د استوګنځيو د وېش په بهير کې د موجوده ستونزو یادونه وکړه او زياته يې کړه، چې د ښارجوړولو او ځمکو وزير سره يې وروستۍ ناستې ته په کتو ددې ستونزې د هواري لپاره هڅې روانې دي.
نوموړي په دې سربېره د شهيدانو وارثينو او معلوليت لرونکو وګړو د معاشاتو د ځنډ په تړاو هم خبرې وکړې او لارښوونه يې وکړه، چې د شهيدانو ټول وارثين او معلولين بايد برېښنايي پېژندپاڼې واخلي، ځکه چې راتلونکي ۱۴۰۰ ه ل، کال کې د ټولو حقوق د برېښنايي پېژندپاڼو له مخې حواله کېږي.
د ناستې په پای کې پرېکړه وشوه چې د شهيدانو او معلولينو په چارو کې د دولت وزارت، پارلمان او د معلولينو مدني بنسټونو څخه به په ګډه کمېټه جوړېږي او د معلوليت لرونکو وګړو ستونزو ته د ښې رسيدنې په موخه به هڅې کوي. د يادې کميټې له جوړيدو سره سم به د ملي شورا تر مخ د معلولينو لخوا د تحصن لګیدلې خيمې هم پورته کېږي.
