تحصيلي بورسونو کې د شهيدانو ورثې او معلولينو لپاره اسانتيا رامنځته کېږي
تحصيلي بورسونو کې د شهيدانو ورثې او معلولينو لپاره اسانتيا رامنځته کېږي
د شهيدانو او معلولينو چارو سرپرست وزير پوهنمل حميدالله فاروقي د کورنيو چارو وزارت د شهيدانو او معلولينو برخې ریيس سمونوال نويد کاوسي سره وکتل او د پولیسو شهيدانو ورثې او معلولينو لپاره يې په تحصيلي بورسونو کې د اسانتيا رامنځته کولو په اړه خبرې وکړې.
ښاغلي کاوسي کورنيو چارو وزارت کې د پولیسو د شهيدانو ورثې او معلولينو ستونزو ته د رسيدنې برخه کې د پرمختګونو په اړه مالومات ورکړه او یاد قشر ته د زده کړو برخه کې د اړینو اسانتياوو برابرول د دواړو ادارو مشترک مسووليت وګڼه او د همکارۍ ډاډ یې څرګند کړ.
د شهيدانو او معلولينو چارو وزارت د ملاتړ او خدمتونو مرستيالې جميلې نورستانۍ د دوست هيواد هندوستان له لوري دغه قشر ته د (۳۳۴) تحصيلي بورسونو اړوند خبرې وکړې وویل: د شهيدانو ورثې او معلوليت لرونکو وګړو لپاره د شرايطو ساده کولو په موخه دې په کابل کې د یاد هېواد سفارت سره د همغږۍ ناسته وشي.
د شهيدانو او معلولينو چارو سرپرست پوهنمل حميدالله فاروقي د کورنيو چارو وزارت او نورو امنيتي او دفاعي بنسټونو سره د همغږۍ او همکارۍ پر زياتوالي ټينګار وکړ.
ښاغلي فاروقي د ملي پوليسو سرښندنې وستايلې، هيله يې وښوده چې اړونده برخه کې ستونزو او غوښتنو ته پر وخت رسېدنه وشي.
ښاغلي فاروقي څرګنده کړه، چې د شهيدانو ورثې او معلوليت لرونکو وګړو لپاره زده کړې حياتي مسله ده او په دې برخه کې ياد قشر تر بل هر چا زيات لاسنيوي او پاملرنې ته اړتيا لري.
نوموړي ژمنه وکړه، چې په کابل کې به د هندوستان سفير سره ناسته وکړي، څو د شهيدانو ورثې او معلولينو لپاره په اعلان شوو تحصيلي بورسونو کې شرایط اسانه کړي.
