د رياست الوزراء اقتصادي مرستیال محترم ملا عبدالغني برادر د شهيدانو او معلولينو چارو وزارت له مرستیال سره وکتل
د رياست‌الوزراء اقتصادي مرستيال محترم ملا عبدالغني برادر نن له غرمې وروسته په خپل کاري دفتر کې د شهيدانو او معلولينو چارو وزارت له مرستیال محترم شیخ صاحب عبدالحکیم حقاني سره وکتل، په دې لیدنه کې د وزارت د اداري، پاملرنې او ساتنې رئيس محترم مولوي سردار محمد حبیب هم حضور درلود.
د دې ليدنې په ترڅ کې محترم شیخ صاحب عبدالحکیم حقاني د ریاست‌الوزراء د اقتصادي مرستیال له پاملرنې او همکاریو څخه د مننې ترڅنګ، د شهیدانو او معلولینو چارو وزارت د لاسته‌راوړنو، فعالیتونو او برنامو او ځینو نورو موضوعاتو اړوند مفصل راپور وړاندې کړ.
د شهیدانو او معلولینو چارو وزارت مرستیال ډاډ ورکړ چې د یتیمانو، کونډو او معلولینو میاشتني نغدي مساعدتونه په بشپړ شفافیت سره حواله کېږي او هغوی ته پر خپل وخت لازم خدمتونه وړاندې کېږي.
په ورته مهال محترم ملا عبدالغني برادر د شهيدانو او معلولينو چارو وزارت د عمده لاسته راوړنو راپور تر اورېدو وروسته، د یاد وزارت د مشرتابه او کارکوونکو له هڅو او فعالیتونو څخه مننه وکړه او د شهیدانو ورثه وو او معلولیت لرونکو وګړو ته یې د لازمو اسانتیاوو پر برابرولو ټينګار وکړ.
