د کونړ د شهيدانو ورثې او معلوليت لرونکو وګړو د اسنادو ارزونه به چټکه او مستحقينو ته به يې حقوق حواله شي
د کونړ د شهيدانو ورثې او معلوليت لرونکو وګړو د اسنادو ارزونه به چټکه او مستحقينو ته به يې حقوق حواله شي
نن د تلې په ۳۰مه، د شهيدانو او معلولينو په چارو کې د دولت وزير ښاغلي لعل الدين اريوبي سره د کونړ د شهيدانو ورثې او معلولينو استازو وکتل.
په دې لېدنه کې چې د شهيدانو او معلولينو په چارو کې د ولسمشر سلا کار عمرا خان منيب او د وزارت د تخنيکي چارو مرستيالې جميلې نورستانۍ هم ګډون درلود، د کونړ نه راغلو د شهيدانو ورثې او معلولينو استازو ښاغلي اريوبي ته د وزارت د دوېيمې کليزې مبارکي وويله، د وزارت لخوا وروستي پرمختګونه او اصلاحات يې وستايل او د وزارت مشرتابه څخه يې د خپل ملاتړ د دوام ژمنه وکړه.
دوی له ښاغلي اريوبي سره په کونړ کې د شهيدانو ورثې او معلوليت لرونکو وګړو د حقوقو ځنډ، بېکارۍ او زده کړو په تړاو خپلې ستونزې او اندېښنې شریکې کړې.
د شهيدانو او معلولينو په چارو کې د دولت وزير د دوی له راتګ او ملاتړ مننه وکړه او ژمنه يې وکړه، چې په کونړ کې د اسنادو او وثيقو له ارزونې وروسته به د شهيدانو ټولو وارثينو او معلوليت لرونکو وګړو ته حقوق ورسېږي.
نوموړي وويل، چې هوډ لري د کونړ جنګ ځپلو ولسونو د ستونزو، غوښتنو او وړانديزونو له نږدې اوريدو په موخه کونړ ولايت ته سفر وکړي او د حل لپاره ورته مناسبه چاره ومومي.
د ناستې په پای کې د کونړ د شهيدانو ورثې او معلولينو استازو، ښاغلي لعل الدين اريوبي ته د غوره رهبرۍ او ښو خدمتونو د ترسراوي په وياړ کونړی پکول او چپنه ډالۍ کړل.
