د شهیدانو او معلولینو په چارو کې د دولت وزارت مشرتابه د کانکور عمومي اولنمره وستایله
د شهیدانو او معلولینو په چارو کې د دولت وزارت مشرتابه د کانکور عمومي اولنمره وستایله
د شهیدانو او معلولینو په چارو کې د دولت وزارت رهبرۍ او کارکوونکو د یوې پرتمینې غونډې په ترڅ کې د ۱۳۹۹ل کال د کانکور ازموینې د عمومي اولنمرې شمسیې علي زاده بریا وستایله او مبارکي یې ورته وویله.
د شهیدانو او معلولینو په چارو کې د دولت وزیر لعل الدین آریوبي شمسیې او د هغې کورنۍ ته مبارکي وویله او د نوموړې له لوري د لومړي مقام ترلاسه کول یې ستر ویاړ وباله، زیاته یې کړه: دې بریا وښوده چې زموږ ښځینه د ډېرو وړتیاوو څخه برخمنې دي او کولای شي له دې ستر ویاړونه وګټي.
ښاغلي آریوبي د هېواد په ټولو میندو او پلرونو غږ وکړ، چې خپلې لوڼې ښوونځیو ته واستوي، تر څو باسواده او د هېواد د ابادۍ او پرمختګ سبب وګرځي.
ښاغلي آریوبي څرګنده کړه، چې دا ډول غونډې د یاد وزارت کاري برخه نه جوړوي، خو د هېواد لپاره د هر افغان لاسته راوړنه باید باارزښته وګڼل شي او په ویاړ یې د ستاینې او خوښۍ غونډې جوړې شي. نوموړي د کانکور عمومې اولنمرې ته ډاډ ورکړ، چې وزارت به یې په راتلونکي کې هم تر ممکن حده ملاتړ وکړي.
د وزارت د جندر برخې سلاکارې صفیې صدیقي هم د شمسیې عمومي اولنمرګي د هېوادوالو لپاره ویاړ وباله وویل، چې افغان کورنۍ باید خپلې لوڼې زده کړو ته وهڅوي او ملاتړ یې وکړي.
تکړه شاعر جمعه نور مجبور د شمسیې د بریا په وصف کې هغې ته خپل لیکل شوی شعر واوره، چې پکې د هېواد یو زیارکښه مېرمن ګڼل شوې وه.
د کانکور عمومي اولنمرې په خپلو خبرو کې د وزارت له رهبرۍ نه د مننې تر څنګ وویل، چې د ملي وحدت ټینګښت او قومي، ژبنو او نورو تعصباتو د ختمولو لپاره به کار وکړي او د راتلونکي یوارینۍ موخه یې خپل هېواد او هېوادوالو ته خدمت دی.
ښاغلي آریوبي مېرمن شمسیه په ستاینلیک او نغدي مرسته او د وزارت مسولینو د ګلونو په ګېډیو او بېلابېلو ډالیو وستایله او د نورو بریاوو هیله یې ورته وکړه.
