د اسلامي امارت د بنسټ اېښودونکي مرحوم امیرالمؤمنین ملا محمد عمر مجاهد رحمه الله یوولسم تلين د شهیدانو او معلولینو چارو وزارت له لوري د یوې غونډې په ترڅ کې ولمانځل شو
د شهیدانو او معلولینو چارو وزارت کې د ثالث عمر، مرحوم امیرالمؤمنین ملا محمد عمر مجاهد رحمه الله د کارنامو، جهاد، سرښندنو او شخصیت په اړه د یوې غونډې په ترڅ کې هراړخیزې خبرې وشوې.
د دې غونډې په ترڅ کې د دعوت او ارشاد رئیس محترم مفتي عبدالاحد مسعود د اسلامي امارت د بنسټ اېښودونکي ملا محمد عمر مجاهد رحمه الله د جهادي ژوند، کارنامو او شخصیت په تړاو خبرې وکړې او هغه یې د افغانستان په تاریخ کې نه هېریدونکی شخصیت وباله.
هغه همداراز زیاته کړه: مرحوم امیرالمؤمنین ملا محمد عمر مجاهد رحمه الله په هېواد کې د کورنېو جګړو، ظلمونو، بې عدالتېو او د فساد په له منځه وړلو کې نه ستړې کیدونکي هلې ځلې کړې دي چې د همدغو هلوځلو په پایله کې هېواد له تجزیې او ظلمونو څخه خلاص او په دې هېواد کې اسلامي نظام حاکم او په دې ترتیب سره د خلکو مال او عزت خوندي کړل شو.
نوموړي همداراز زیاته کړه چې پر موږ لازمه ده چې نوي نسل ته د مرحوم امیرالمؤمنین ملا محمد عمر مجاهد رحمه الله په لوړو کارنامو، دین هېواد او خلکو ته د هغه نه ستړې کیدونکو خدمتونو په اړه پوهاوی ورکړو.
