د شهیدانو او معلولینو چارو وزارت د ځینو خصوصي بانکونو له استازو سره د یاد وزارت اړوند پاتې شوېو معلق پیسو د بیرته راګرځولو په موخه غونډه ترسره کړه
په هغه غونډه کې چې په همدې موخه د شهیدانو او معلولینو چارو وزارت کې جوړه شوې وه په هغه کې د مالي او اداري چارو عمومي رئیس محترم مولوي کلیم الله افغان، د مالي او حسابي چارو رئیس محترم قاري محمد امین درویش او د کابل بانک او میوند بانک استازو ګډون کړی وو.
په دې غونډه کې د شهیدانو او معلولینو چارو وزارت د مالي او اداري چارو عمومي رئیس محترم مولوي کلیم الله افغان د ملي بودیجې د پر ځای او پر موقع د مصرفولو په تړاو خبرې وکړې او زیاته یې کړه: "ملي بودیجه یو ملي امانت دی او له نیکه مرغه د ملي عوایدو څخه تمویل کیږي چې په دې برخه کې ټول مکلف دي ترڅو د یادې بودیجې په مصرفولو کې له پوره شفافیت او دقت څخه کار واخلي".
نوموړي همداراز په ځینو خصوصي بانکونو کې د وزارت اړوند، د یتیمانو، کونډو او معلولینو د بیلابیلو دلایلو له امله د پاتې شویو معلق پیسو په هکله هم هراړخیزې خبرې وکړې او د یادو خصوصي بانکونو له استازو څخه یې وغوښتل تر څو د شهیدانو او معلولینو چارو وزارت اړوند معلق شویو پیسو په بیرته راګرځولو کې له یاد وزارت سره پوره همکاري وکړي.
په ورته وخت کې د کابل بانک او میوند بانک استازو د یادو پیسو په بیرته راګرځولو کې د هر اړخیزې همکارۍ ژمنه وکړه.
