د شهیدانو او معلولینو چارو وزارت د مالي او اداري چارو عمومي رئیس په مشرۍ پلاوي په پنجشیر ولایت کې د یاد وزارت د اړوند ریاست کړنې او فعالیتونه په هر اړخیز ډول وڅېړل
د شهیدانو او معلولینو چارو وزارت د مالي او اداري چارو عمومي رئیس مولوي کلیم الله افغان په مشرۍ با صلاحیته پلاوی چې د داخلي تفتیش رئیس مولوي احسان الله حقاني، د معلولینو د تثبیت آمر حافظ عبدالکریم او همدارنګه د ارزونې او څارنې ریاست غړی یې ملتیا کوي، په پنجشیر ولایت کې د دغه وزارت اړوند ریاست فعالیتونه او کړنې یې په هر اړخیزه توګه بررسي او وڅیړلې.
د شهیدانو او معلولینو چارو وزارت د مالي او اداري چارو عمومي رئیس مولوي کلیم الله افغان د نوموړي ریاست د کاري بهیر د څیړلو په ترڅ کې د یاد ریاست کارکوونکو ته د شهیدانو او معلولینو چارو وزارت د قانون او کړنلارې سره سم د یتیمانو او معلولینو د ثبت او تثبیت په موخه لازمې لارښوونې وړاندې کړې.
د شهیدانو او معلولینو چارو وزارت د مالي او اداري چارو عمومي رئیس سره راغلي پلاوي په دغه ریاست کې د یو شمېر یتیمانو او معلولینو اسناد وڅیړل او د تثبیت په پروسه کې د شفافیت د شتون د ډاډ ترلاسه کولو په موخه له یو شمېر یتیمانو او معلولیت لرونکو وګړو سره له نږدې وکتل او د هغوې څخه یې د خدمتونو د وړاندې کولو د څرنګوالي په هکله پوښتنې وکړې.
همدارنګه یاد پلاوي د پنجشیر ولایت د شهیدانو او معلولینو چارو ریاست پر وړاندې د شته ستونزو د حل په موخه د یاد ولایت له والي ښاغلي الحاج مولوي محمد محسن هاشمي سره هم وکتل. په دې کتنه کې مولوي کلیم الله افغان د پنجشیر ولایت د شهیدانو او معلولینو چارو ریاست پر وړاندې پرتو ستونزو او ننګونو په هکله خبرې وکړې او د نوموړي ریاست پر وړاندې د شته ستونزو او ننګونو د حل په برخه کې د لازمو همکاریو غوښتنه وکړه.
په ورته وخت کې د پنجشير ولایت والي الحاج مولوي محمد محسن هاشمي ژمنه وکړه چې د نوموړي رياست پر وړاندې پرتې ستونزې او ننګونې به په هراړخيزه توګه حل کړي .
په پام کې ده چې یاد پلاوی به د کاپیسا او پروان ولایتونو د شهیدانو او معلولینو چارو ریاستونو کاري بهیر هم په هر اړخیزه توګه وڅېړي.
