په جينوا کنفرانس کې د کړو ژمنو د پلې کولو په تړاو تعقيبي ناسته وشوه
په جينوا کنفرانس کې د کړو ژمنو د پلې کولو په تړاو تعقيبي ناسته وشوه
نن چهارشنبه د چنګاښ په دويمه، د شهيدانو او معلولينو چارو وزارت رهبري هييت په جينوا کنفرانس کې د افغان حکومت له لوري د شويو ژمنو او د وزارت اړوند برخو کې د يادو ژمنو د پلې کولو په تړاو تعقيبي ناسته وکړه.
په پيل کې آغلې اندړ په جينوا کنفرانس کې د حکومت له لوري د شويو ژمنو پلې کول اړين وبلل او دا يې په نړيواله کچه د افغانستان حيثيت او باور پورې تړلې موضوع وشمېرله.
د نوموړې په خبره، چې په جينوا کنفرانس کې د نړیوالو عمده غوښتنې د فساد پر وړاندې مبارزه او د ښځو پر وړاندې د تاوتريخوالي کچې راټيټول و، کومې چې د پلې کولو لپاره یې د نورو دولتي ادارو ترڅنګ، د شهيدانو او معلولينو چارو وزارت ژمنتيا او پخه اراده لري.
د وزارت د خدمتونو او ملاتړ مرستيالې جميلې نورستانۍ د هېواد په کچه د معلوليت لرونکو ميرمنو پر وړاندې د تاوتريخوالي او توپيري چلند په تړاو عامه پوهاوی مهم وباله او په دې برخه کې يې له نورو دولتي او غير دولتي بنسټونو څخه هم د ملاتړ غوښتنه وکړه.
د ناستې نورو ګډونوالو هم د فساد پر وړاندې مبارزه کې د پرمختګونو يادونه وکړه او د معلوليت لرونکو ميرمنو پر وړاندې د تاوتريخوالي، توپيري چلند او ټولګټو ځايونو ته د هغوی نه لاسرسی جدي ستونزې وګڼلې او د هواري لپاره يې د هر اړخيزو همکاريو ډاډ ورکړ.
