له کوچني اختر وړاندې به د شهيدانو ورثې او معلوليت لرونکو وګړو لپاره حقوق حواله شي
له کوچني اختر وړاندې به د شهيدانو ورثې او معلوليت لرونکو وګړو لپاره حقوق حواله شي
د شهيدانو او معلولينو چارو وزارت مشرتابه هئيت د روژې مبارکې مياشتې په درناوي او د شهيدانو درنې ورثې او معلوليت لرونکو وګړو ستونزو ته په کتو، پرېکړه وکړه چې د بشپړ اسنادو درلودو او د ارزونې او کتنې کميسيون څخه د سم ګڼلو په صورت کې به د نظامي شهيدانو ورثې او معلوليت لرونکو وګړو لپاره د ۱۴۰۰م لمريز کال ټول حقوق او د ملکي شهيدانو ورثې او معلوليت لرونکو وګړو ته د روان کال شپږو مياشتو حقوق له کوچني اختر وړاندې په يو ځايي ډول حواله کړي.
نو پر همدې بنسټ نن سه شنبه د غويي په ۷مه، د شهيدانو او معلولينو چارو وزارت د خدمتونو وړاندې کوونکې او ملاتړ مرستيالې جميلې نورستانۍ په مشرۍ د اسنادو د پروسس چارو د چټکتيا په موخه د اشر په ډول د وزارت له کارکوونکو د اسنادو د کتنې او حقونو د حواله کولو لپاره ګډه کميټه جوړه کړه، څو په روژې مبارکې مياشتې کې د بشپړ اسنادو لرونکو شهيدانو ورثې او معلولينو لپاره حقوق تاديه شي.
آغلې نورستانۍ د ملکي شهيدانو له هغو درنو وارثينو او معلوليت لرونکو وګړو څخه، چې لا يې هم برېښنايي تذکرې نه دي اخيستې او اسناد يې نيمګړتياوې لري، وغوښتل چې اسناد تکميل کړي، څو ژر تر ژره خپل حقوق ترلاسه کړي.
يادونه: له ۱۳۸۰ هجري لمريز کال را په دېخوا د نظامي شهيدانو ورثې او معلولينو د اسنادو د ارزونې بهير اسانۍ ته په کتو، نژدې ټول اسناد د بشپړيدو په حال کې دي او د برېښنايي تذکرې د درلودو په صورت کې به ورته د ۱۴۰۰ھ لمريز کال ټول حقوق او له برېښنايي تذکرو پرته به ورته د شپږو مياشتو حقوق حواله شي.
